Nongpoh, Risaw 30: Kumba mynta ka la dei ka aion ba ki nongrep ki hap ban lum ban lang ïa ki mar rep bad khamtam u kba ba la dei ka por ot bad ban lum ban lang, ka Raid Marngar ha Ri Bhoi ka la mana ïa ki khun ki hajar ba kim dei ban wan rah ïa u Kwai im bad ruh ïa u Sohphlang na Shillong sha ki shnong ki thaw kiba hap ha ka Raid Marngar ha Ri Bhoi District.
Haba kren sha ki lad pathai khubor, u Syiem ka Raid Marngar, u Paiem Richard Syiem u la ong ba kane ka dei ka jingmana kaba la ju mana naduh hyndai hynthai bad ka la dei ruh kat kum ka jingngeit tynrai ba ha ka por lum por lang khamtam ïa u kba ba kat ba ym pat dep ban ot ne lum ne lang ïa u kba, la khang pyrshah ban wan rah ïa u kwai im bad ruh ïa u Sohphlang sha katei ka Raid.
Related Posts
U la ong ruh ba kane ka dei ka jingngeit ba lada ïaleh pyrshah ïa kane ka jingmaham ne mana jong ka Raid ka lah ban poi ka nem sniew kaba lah ban lynshop ïa ki mar rep khamtam ïa u kba, ba dang dei ka aiom ban ot ha kaba ki nongrep baroh ki dang ap khmih lynti ban hiar noh sha ki pynthor kba na ka bynta ban ot noh ïa u kba ba la dei ka aiom ot bad ka aiom ban lum ban lang.
“Kane ka dei ka jingngeit tynrai kaba la ju bud naduh hyndai hynthai bad ba la ïalam ruh da ki longshuwa ki manshuwa ba ym ju bit ban hiar u kwai im bad u Sohphlang na Shillong bad lada don kiba ïaleh pyrshah ka lah ban ktah ïa ki nongrep kum ka jinglynshop ka eriong bad u phria ïa u kba bad kiwei ki mar rep jong ki nongrep” ong u Paiem Rihard Syiem.
Namarkata, kumba kane ka jingngeit ka la dei ka riti ka dustur ba la ïa bud naduh hyndai hynthai, ka Raid Marngar ka la mana ïa baroh ki khun ki hajar ba kim bit da lei lei ruh ban wan rah ïa u Kwai im bad ruh ïa u Sohphlang kaba ym pat dep ka aiom ot kba bad dei tang haduh ba la ai bor ban wan rah ki khun ki hajar ki lah ban wan rah ïa u kwai im bad u sohphlang sha kane ka Raid, u la bynrap.