Jowai, K’lyngkot 31: Ka Jaiñtia Fishing and Environment Protection Association (JFEPA), Jowai ka la maham tyngeh pyrshah ïa kino kino kiba pynïap dusmon ïa ki dohkha ne ki doh um doh wah kiba don ha ki bynta jong ka Fish Sanctuary (Syntu Ksiar) jong ka Wah Myntdu bad kumjuh ruh ha baroh shi lynter ka wah Myntdu.
La mana ban pynïap da ki doh um doh wah da kaba pyndonkam da ki bom, noh jar, beh kynjun, tong sasi ne da kaba shoh ïa ki maw ha ka wah ba shong ba sah ki dohkha doh pnat.
Ka Association ka kyrpad ruh ïa kino kino kiba ïohi ne lap ïa kiba leh ïa kum kane ka kam ïa ki dohkha, kin sngewbha ban pyntip mardor sha ki nongkit kam ne sha ki dkhot ka JFEPA.Ïa kino kino kiba lap bad kiba ai jingtip sha ka Association, ka Association kan ai Buskit ïa ki bad ruh kam ym pynpaw satia ïa ka kyrteng jong ki nongai jingtip.
Ha ka juh ka por ka Association ka kyrpad ïa baroh ki riew ieit khwai dohkha ban ïatrei lang bad ka seng. Ïa kane ka khubor la phah da u President ma D.H. Pde bad u General Secretary ka JFEPA ma M. Challam.
