Nongpoh, Risaw 21: Ka Dorbar Raid Marngar jong ka Hima Mylliem lyngba ka kyrwoh na u Paiem Richard Syiem u la pynbna paidbah da ka jingmaham ïa baroh ki khun ki hajar ka Raid Marngar bad kumjuh ruh na ka bynta kito ki nongwan shong iew ha Iewmawlong bad ruh ki nongdie jngdie ba kim bit satia da lei lei ban wan rah ïa u kwai im bad ruh ïa u Sohphlang na kiwei ki jaka sha ki shnong ki thaw bad kumjuh ruh ha katei ka iew katba ka aiom ban lum ban lang bad ban ot ïa u kba u khaw kam pat dep.
Kane ka jingmana ban wan rah kwai im ne u Sohphlang hapoh ka Raid Marngar ka dei kaba la shim ruh katkum ka jingngeit pateng la pateng naduh ki por hyndai hynthai bad tad haduh kine ki sngi ki dang pynim ïa kane ka jingngeit bad lada ïaleh pyrshah kin wan jia ki jngjia nem sniew kba lah ban lynshop ïa u kba u khaw, ha kaba kane ka dang dei ka aiom ban ot bad ban lum ban lang ïa u kba u khaw na ki pynthor bad kumjuh ruh kiwie kiwei ki mar rep.
La pynshai paidbah ba kane ka jingmane ne ka jingmham ban khang ban wan rah ïa u kwai im bad u Sohphlang, ka dei kata ka jingngeit tynrai bad ki bynta jong ka riti ka dustur ba la bud ryntih da ki khun ki hajar kumba la ïalam naduh hyndai hynthai da kita ki longshuwa ki manshuwa bad lada don kata ka jingïaleh pyrshah ka ju wan jia kitei ki nem sniew kum ka eriong bad u phria kiba lah ba lynshop ïa u kba u khaw ba kane ka dang dei kata ka aiom ban ot bad ban lum ban lang ïa u kba u khaw.
Kum u Syiem u Kmie jong ka Raid Marngar bad uba peit ruh ïa kata ka riti ka dustur ban pynneh pynsah ïa kata ka jingngeit tynrai, u la buh ïa kat ka jingmana kaba tyngeh sha baroh ki khun ki hajar ka Raid Marngar, ki nongshong iew bad ki paidbah hi baroh kawei ba kim dei ban wan rah ïa u kwai im bad u sohphlang sha ki shnong ki thaw lane ha katei ka iew bad lada don kino kino kiba ïaleh pyrshah lada lap kin ngat ha ka jingpynshitom katkum ki kyndon jong ka Raid Marngar.
