Man ka lyiur shlei um bun ki shnong ka thaiñ Byrnihat, pynthikna u Myntri ban weng ïaki jingeh

Nongpoh, Nohprah 11: U Bah Sosthenes Sohtun Myntri ka tnad C&RD ka sorkar jylla ba dei ruh u MLA ka Jirang mynta ka sngi u la leit ban jurip ïaka thaiñ Byrnihat, kaba dei halor ki jingeh ba la ju mad ki paidbah ha kaba ïadei bad ka jingshlei um kaba ju jia man ba poi ka aiom lyiur.
Ha katei ka jingjurip la sakhi ruh da ka jingdonlang u Abhilash Baranwal Deputy Commissioner ka Ri Bhoi, u Bah Eric Dkhar BDO ka Umling C&RD Block, ki nongmihkhmat bad engineer ka NHAI ryngkat ki paidbah nongshong shnong.
Lyngba katei ka jingjurip hadien ka jingïakren bad ki ophisar ka NHAI, u Bah Sosthenes Sohtun u la pynthikna ba shen yn weng noh ïa kitei ka jingeh, kaba ki paidbah ki ju kynduh bad ruh naka liang ka NHAI kan sa shna ruh 2 tylli ki jingkieng Foot Overbridge ha Byrnihat Proper bad ha Nongthymmai 15 mer bad ban pynitynnad ruh ïaki bynta ka surok National Highway naduh Jorabat haduh Byrnihat.