Shillong, Jylliew, 15: U Myntri uba peit ïa ka tnat District Council Affairs (DCA) u Bah Lahkmen Rymbui ha ka sngi Balang u la maham ba ka jingpyllait pisa sha ki lai tylli ki Autonomous District Councils (ADC) ki lah ban shah ktah na lada ki dang pynslem ban phah ïa ka Account.
“Kane ka dei kaba khia. Ki (ADC) dei ban sngewthuh bad ki dei ban phah (ïa ki Account) kham kloi katba lah namar lada kim lah ban phah ha ka por kaba biang, ka lah ban ktah ïa ka jingpyllait pisa sha ki District Council ha ki snem ban sa wan,” ong u Bah Rymbui ha ka jingïakren bad ki lad pathai khubor.
Ha ka 10 tarik, Jylliew, u Lat ka Jylla u Satya Pal Malik u la bthah ïa ka Sorkar ba ka dei ban thung da ka jingtohkit halor ka jingbym lah jong ki lai tylli ki ADC ban phah ïa ki Account jong ki snem kiba ladep.
Kane ka jingbthah jong u Lat ka la wan hadien ba la ïoh pdiang ïa ka shithi na u Comptroller and Auditor General of India (CAG) ha ka 8 tarik mynta u bnai ha kaba ïadei bad ka jingbym phah jong ki lai tylli ki ADC ïa ki Account jong ki snem kiba ladep bad ka jingrah ïatai ïa ki kaiphod jong u CAG ha ki District Council.
Haba kylli hato ka sorkar kan phah tohkit neem halor ka jingpynslem, u Bah Rymbui u la ong watla um pat ïohi ïa ka shithi kaba wan na u Lat, ka Sorkar Jylla ka ladep khot ïa ka jingïalang bad ki lai tylli ki ADC dang ha u bnai ba ladep.
“Ngi la bthah ïa ki lai tylli ki ADC ba ki dei ban ai jubab sha u CAG bad ban phah kopi ruh sha ngi khnang ba ngin dup tip. Hynrei, haduh mynta, ngim pat ïoh jubab satia na ki ADC. Namarkata, ngi dang ap ïa ka jubab na ki,” u la bynrap.
Shuh shuh une u Myntri ka DCA ula ong ba ka tnat ka la bthah ïa ki ADC ba ki dei ban pynbeit noh mardor ha kaba ïadei bad ka pisa ka pilaiñ.
U Bah Rymbui u la ïathuh ba katkum ka kaiphod jong u GAC, ki ADC kim shym la phah ïa ka Account jong ki na ka bynta u snem 2009, 2010 bad 2011.
