Nongpoh, K’Lyngkot 30: Namar ka elekshon sha ka iing Dorbar jong ka KHADC ka ban long ha ka 21 tarik Rympang, u District Magistrate ka Ri-Bhoi hadien ka jingpntreikam ïa ka Model Code of Conduct bad katkum ka kyndon aiñ 163 jong ka Bharatiya Nagarik Suraksha Sanhita, 2023 u la mana ban rah pisa palat ïa ka 50 hajar, ki ksiar ne rupa khlem ki kot pynshisha bad la mana ruh ban wah ïa ki poster ne kino kini ki jingpynbna khlem ki jingpan jingbit.
U District Magistrate u la maham ruh ban rah kino kino ki tiar siat ne tiar pynbthei ha baroh kawei ka District tad haduh bala dep ka elekshon, hynrei kane ka hukum kan nym treikam satia ïa ki bor pulit, shipai bad baroh ki paidbah kiba don ïa ki License suloi ba kin leit ban aiti noh ïa ki tiar siat ryngkat ka xerox kopi jong ka License ka jong ki ha ki Police Station ba hajan eh hapoh 14 sngi naduh bala pynmih ïa kane ka hukum.
Kino kino ki briew ba pynkheiñ ïa kitei ki jingmaham bad hukum kin ngat ha ki kyndon aiñ bad kane ka hukum kan treikam naduh mynta tad haduh ban da kut ka elekshon MDC.
