Shillong, Risaw, 23: Ki Pulit ka tnat pynïaid kali jong ka Shillong Traffic Police (STP) ki la maham tyngeh ïa ki nongniah kali saw shaka ba kynthup ïa ki nongniah local taxi bad kali shimet bad ïa ki nongniah thuk thuk ar shaka ba kim dei satia ban pynkheiñ ïa ki kyndon jong ka Motor Vehicle Act khamtam ha ki surok ka sor Shillong ba la buh ïa ka signboard No Entry.
Kane ka jingmaham jong ka Shillong Traffic Police (STP) ka long hadien ba la lap bunsien ki nongniah kali bad ki nongniah thuk thuk ki ju pynkheiñ ïa ki kyndon niah kali bad ki ju rung ruh sha ki jaka ba la buh ïa ka Sign Board No Entry.
U Addl. Superintendent of Police (ASP) Traffic ka East Khasi Hills u Bah Ian Onel Swer ha u kyrwoh ba la phah ha ka sngi u Blei u la pyntip ba ka don kawei ka kali Maruti local taxi bym da ïohi shai bha ïa u nombar, ba la shu shondur da ki nongïaid lynti, ka la rung lyngba ka surok kaba don ha lyndet ka City Dhaba kaba mih sha Polo wat haba la buh ïa ka Sign Board No Entry.
“Kane ka jingpynkheiñ aiñ jong uwei ne arngut ka buh ïa kiwei pat ha ka jingma bad ka jingmynsaw,” ong u Bah Swer.
“Katto katne ki paidbah ki la pyntip sha ka WhatsApp Number ba la ai da ki Pulit ka Shillong Traffic Police bad mar mar ki Pulit ki la ïoh ban bat ïa u nongniah jong kane ka kali,” la bynrap u Bah Swer.
Ka Shillong Traffic Police (STP) ka kyntu ïa ki nongshong shnong ba kin pyntip sha ki Pulit lada lap ïa ki nongniah kali saw shaka lane ar shaka kiba pynkheiñ ïa ki kyndon jong ka Motor Vehicle Act da kaba telephone ha u nombar 0364: 2215427 bad ha u WhatsApp Number: 6009196479. “Ïa ki paidbah ba ai jingtip yn buhrieh kyrteng,” la kular ki Pulit.
Ki Pulit kiba la pyntreikam ïa ki kyndon jong ka aiñ, ha kine ki sngi ki la bat ïa uwei u nongniah thuk thok ar shaka bad shaiñ kuna T.2000 hajar hapoh ka kyndon 179 (1) jong ka Motor Vehicle Act hadien ba la lap ba une u trai jong kane ka thuk thuk u la bujli ïa u Silencer jong kane ka thuk thuk.
Ka jingbujli ïa u Silencer jong ka thuk thuk ka pynsawa bha haba niah ha surok.
Ki Pulit ki la maham tyngeh ïa kito kiba niah ïa ki thuk thuk motor cycle ba kim dei ban pynkheiñ ïa ki kyndon jong ka aiñ hynrei lym kumta kin ngat ha ka jingshah daiñ kuna.
