Shillong, Ïaïong 22: Ki pulit ka East Garo Hills ha ka sngi baar ki la maham tyngeh ban pyndonkam da ka aiñ pyrshah ïa kito kiba pyrshang ban shim kabu halor ka jingjia pluh ding kaba la jia ha ka shnong Morrongga da ka jingthmu ban wanrah ki jingpynthut ïa ka shongsuk shongsaiñ bad kumjuh ruh ka jingïapher jaitbynriew.
Kane ka jingjia pluh ding ka la jia ha ka ïing jong ka Presila N. Marak kaba ha ka shnong Morongga Nengkram ha ka sngi baar.
Mardor ka kynhun napoh ka Fire and Emergency Service Station Rongjeng ki la leit kloi sha kane ka jaka bad ki la lah ban pynlip noh ïa ka ding kaba la klang.
“La pynthikna ba ym shym la don mano mano hapoh kane ka ïing haba kane ka jingpluh ding ka la jia. Shuh shuh ïa ka daw jong kane ka jingpluh ding ka dei na ka jingthut ka wiring bad kam shym la don kano kano ka jingsuba ba don kiba thang khnang,” ïathuh u SP ka district u Bah SA Rynjah.
“Mano mano kiba shim kabu ïa kane da kaba thmu ban thaw ne wanrah ki jingthut ïa ka shongsuk shongsaiñ bad ka jingwanrah ka jingïapher jaitbynriew, kin shah pynshitom da kaba tyngeh katkum ka aiñ,” u la maham.
