Shillong, Jymmang, 13: Ka ophis jong u Additional Deputy Commissioner bad CEO ka DDMA, East Khasi Hills District, Shillong ka la maham ïa ki paidbah ba ki dei ban long kiba phikir bha bad kiba husiar namar ka jingjur jong u slap khnang ban lait na kino kino ki jingjia basngewsih.
Katkum kane ka jingmaham la bthah ïa ki paidbah nongshong shnong ba ki dei ban long kiba phikir ban ïada ïalade namar ka jingshlei um kaba lah ban jia hadien ka jingther jong u lapbah khamtam ha ki jaka kiba harud wah bad ki wahduid.
La bthah ruh ban kiar na kaba jam ïa ki wahduid, ki nala bad ki wah haba don ki jingshlei um. La bthah ban ym tur ne niah kali haba don ka jingshlei um bad kiar na ki Post Ilektrik ban lait na ka jingshah bat ha ka bording Ilektrik.
La kyntu ïa ki paidbah ban kiar na kaba jam ïa ki wahduh bad ki wah bah ha ka por ba jur u slap. La kyntu ruh ban kiar na kaba tur shajan ki wahduh, ki wahbah bad ki kshaid.
Ki paidbah ki dei ban kiar katba lah ban jam sha shiliang jong ki wahbah ne ban ïaid lyngba ki um kiba tuid namarba yn ym lah ban tip ïa ka jingkhlaiñ bor ki lat lat jong ka um bad ka um kaba jyndong bad tuid stet ka lah ban pynkyllon ïa ki briew haba ïaid.
