Nongpoh, Nailur 28: Ki nongïalam shnong ba don kumba 14 tylli ki shnong naduh Bir haduh Nongsangu hapoh ka lama ka Synjuk ki Rangbah Shnong Mawrong Area ha ka sngi Saitjaiñ ki la lum syndon da ka jingïalang ba kyrkieh hadien ka jingdon ki briew kiba thmu ban wanrah ïa ka jingsyier ïa ki paidbah bad kumjuh ruh ka jingma na kano kano ka jingjia ba sngewsih.
Kum ban shu pyntip, dang ha kine ki khyndiat sngi uwei u heprit ba la 9 snem ka rta na ka shnong Bir, ka shnong kaba don la lynti ban leit sha ka shnong Mawrong ha Ri-Bhoi District, u la shah rahbor bad shah bret ha ki runar bym lah ban ithuh sha kawei ka jaka ba long khlaw ha katei ka shnong katba u dang leit shim jingbam sniang na iing jong i meikha ha ka por kumba 4 baje eiei, ryngkat kawei ka borti ban rah jingbam sñiang hynrei utei u heprit u khlem wanphai iing shuh tad haduh ban da lap ïa u na kawei ka jaka khlaw hapdeng ka jingbym tip briew, bala ïoh jingtip ruh ba kitei ki runar ki dei ruh kiba kren daka ktien Bhoi.
Sa kawei pat ka jingjia ha ka shnong Rtiang ka shnong kaba tang 2 kilometer na ka shnong Bir, ha kaba ki la don ki briew phylla ha katei ka shnong bad katto katne ki riew rangbah na ka Shnong Rtiang ki la pyrshang ban ïa kren, hynrei kitei ki briew ki la phet pynban sha khlaw kaba la nang pynsuba sniew shuh shuh ïa ki paidbah bad ki nongïalam shnong.
Dei halor katei ka nongrim ba kum ki nongïalam shnong ha katei ka thaiñ hapoh ka jingïalam u Bah BB Makdoh kum u Chairman ki la lum syndon da ka jingïalang ban maham da kaba tyngeh pyrshah ïa kino kino ki briew kiba thmu ban wanrah ka jingtieng jingsyier ïa ki paidbah bad kum ki shnong nangne shakhmat ki ai ka jingïatreilang ban bat ïa kino kino ki briew kiba ishankhmat kiba wan rung sha kitei ki jaka.
Ki paidbah ki dei ruh ban ai jingtip sha ki nongïalam shnong ïa ka jingdon ki briew ba nabar naduh ki nongshong wai bad ki nongtrei bylla na ka bynta ka jingshngaiñ jong ki shnong ki thaw, khnang ba ki paidbah kin nym shong syier khamtam ha ka por mynmiet.
Kum ki Rangbah Shnong ki la pynpaw ka jingsngewkhia halor kitei ki jingjia bala jia ha katei ka thaiñ bad lada lap ïa kino kino kiba leh pyrshah khamtam ki briew kiba ishankhmat na ka liang ka shnong kan kem bad leh da kaba tyngeh bad ban aiti sha ki bor ka aiñ.
