Shillong, Naitung, 10: Ka Meghalaya SSA School Association (MSSASA) ka la maham ban pynlong da ka jingïakhih kaba khlem pud sngi naduh ka 18 tarik mynta u bnai lada ka Sorkar Meghalaya Democratic Alliance (MDA) kam pynurlong ïa ki jingdawa jong ka seng hapoh ka 15 tarik mynta u bnai.
Dang ha ka taiew ba ladep, ki nongïalam jong ka MSSASA ki la ïakynduh ïa u Myntri ka tnat Pule Puthi ka Sorkar Jylla ban pynsngew ha u halor ka jingeh kaba ki nonghikai skul SSA ki la ïakynduh na ka daw ka jingbym ïoh tulop la san bnai kynthih, kata, naduh u bnai Rymphang haduh Jylliew, 2022.
“Ha ka jingïalang kaba la long ha ka 25 tarik u bnai baladep, ka MSSASA ka la shim ïa ka rai ba lada ka Sorkar Jylla ka lah ban pynurlong ïa ki jingdawa hapoh ka 15 tarik, mynta u bnai, ngin pynlong da ka jingïakhih bajaijai kaba khlem pud sngi kum ka jingpyrshah ïa ka jingleh mynthi jong ka Sorkar MDA ïa ki nonghikai skul SSA,” ong u President ka MSSASA u Bah Aristotle Rymbai ha u kyrwoh ba la phah sha ki lad pathai khubor ha ka sngi u Blei.
“Nga pyntip sha baroh ki para nonghikai skul SSA, lada ka Sorkar kam pynurlong ïa ki jingdawa shwa ka 15 tarik mynta u bnai, ha ka 18 tarik mynta u bnai ngin pynlong ïa ka jingïakhih kaba khlem pud sngi ha Parking Lot, kaba don markhap bad ka Additional Secretariat,” la pynbna une u nongïalam ka MSSASA.
“La san bnai kynthih ki nonghikai kiba hikai ha ki skul SSA kim shym la ïoh tulop, kata, na ka bynta u bnai Rymphang bad Lber kaba dei jong ka Financial Year 2021-2022 bad jong u bnai Ïaiong, Jymmang bad Jylliew jong ka Financial Year 2022-2023,”
Ha u kyrwoh une u nongïalam ka MSSASA u la ong, “nalor ka jingdawa ban pyllait noh ïa ka tulop kaba dang sahteng sa san bnai kynthih, ngi dawa ruh ïa ka Sorkar ban pynkiew ïa ka tulop jong ki 12,451 hajar ngut ki nonghikai skul SSA kiba hikai ha ki Lower Primary bad Upper Primary hapoh ka skhim Samagra Shiksha Abhiyan (SSA).”
“Ngi kyrpad ruh ïa ka Sorkar ba kan mang kham bun ka pisa na ka State Budget sha ka SSA bad ban pynkynriah noh ïa ki nonghikai skul SSA na ka State Implementation Society (SIS) sha ka tnat Pule Puthi katkum ki kyndon jong ka Right to Education (RTE),” u la ong.
