Jowai, Ïaïong 30: Ka Khasi Student Union (KSU) West Jaiñtia Hills District Unit ha ka miet jong ka 28 tarik kala hiar sha CHC Ummulong haka por shiteng synñia, hadien ba la ïoh ïaka jingujor na kawei ka longkmie ba katei ka CHC kam pdiang satia ïa i khun jong katei ka longkmie hapoh katei ka jaka sumar sorkar.
Hadien kane mar mar ka seng kala leit mih sha katei ka jaka sumar khnam ban lap ïa ka jingshisha bad ha ka jingïakren ha katei hi ka miet na ka liang ki nongtrei bad ki Doktor jong katei ka jaka sumar kila ai shibun ki daw bad ka jingbym biang ki jingdonkam hapoh ka CHC.
Kumta ka seng kala maham jur ïa katei ka jaka sumar khamtam ïa ki nongtrei bad Doctor da kaba kila pyntip ba kane ka dei ka sien ba khadduh ba kum kine ki jingjia kim dei shuh ïaki paradoh parasnam.
Ka seng kala kren shai lada ka dang lap sa shisien kum kine ki jingjia na ka liang ka seng kam ban se ban leh syndon da ka kam kaba tyngeh pyrshah ïa ki nongtrei katei ka jaka sumar jong ka CHC Ummulong da ka ba khang tala noh syndon ïa ka.
