Maham ka KSMB ïa ki Polical Party ban ym shim kabu saiñpyrthei ïa ka jingdawa Civil Sub-Division

Mawkyrwat, Ïaïong, 24: Ka kynhun jong ki Sengbhalang Mawsynram Block kiba kynthup ïa ka KSU, HANM, FKJGP, HUAM, HYC ki la ïoh ban leit pynshai paidbah ha kaba ïadei bad ka jingdawa na ka bynta ka Civil Sub-Division ïa ka Mawsynram Block ha kylleng ki jaka jong ka Area Mawsynram bad halor kane ka jingdawa ka la buh ruh ka jingmaham ïa ki political party ba kin dei ban shim kabu ne ne pynlong kum ka rynsan ïalap elekshon, halor kane ka mat jingdawa.
Kane ka Kynhun ki Sengbhalang ha ka jingïaid lynti jong ka ban pynshai sha ki paidbah jong ka Mawsynram Block ka la ïoh ban pynlong ha Dangar, Hat Mawdon ha kane ka taïew ba la dep bad ha ka 23 tarik mynta u bnai pat ka la ïoh ban pynshai paidbah hapoh shnong Lawbah, East Khasi Hills District ha kaba ha kane ka sngi lah ïoh ka jingkren na u samla Drimshon Kharmawleiñ, President ka KSU Sawsymper Circle, u Kyrmen Shangdiar, Working President FKJGP South Eastern Zone, Mawsynram Block, bah G. Kharraswai na ka HUAM bad samla Kyllang Thongni, Vice-President ka HANM Central Body.
Ha kane ka sngi na ka liang ki nongkren ki la pynsngew bad dawa na ka Sorkar MDA kaba la lamkhmat da u Conrad Sangma ba kin kyntiew noh ïa ka Mawsynram C&RD Block sha ka Civil Sub-Division namar ka dei ka block kaba lah rim tam hapoh ka jylla, namar lah seng ne thung ïa ka naduh u snem 1960 ha ka por ba dang synshar ka Assam Government bad mynta ka lah dap 60 snem hynrei haba phai ka jylla Meghalaya pat dang khyndiat bnai ka dang rakhe ïa ka jingdap 50 snem.
Shuh shuh ha ka jingkren jong ki ha ka jingïalang ki lah kynthoh jur ïa ka jingleh shilliang khmat jong ka sorkar u Conrad Sangma bad leh politik ïa kiba u don ka jingïadei namar lada u don mon u ai Civil Sub Division bad distrik watla ka population ne jingdon briew ruh ka dang rit bad duna. Hynrei balei ïa ka Mawsynram pat kaba sa tang katto katne snem kan sa ïoh ban rakhe ‘platinum jubilee’ hynrei kim ai satia??
Namarkata, ki la buh ka jingkylli, hato kam dei ka tarajur ka noh shilliang?? Kumta ka Kynhun ki Sengbhalang ka ïeng rangbah halor kane ka mat jingdawa bad ban pynlong jingïalang ha kylleng ki jaka jong ka Mawsynram ban pynsngew ha ki paidbah halor kane ka mat kaba kongsan.
Khadduh eh na ka liang ka Kynhun ki Sengbhalang kan pynkut ïa ka jingpynshai paidbah ha ïew Mawsynram bad lada ka sorkar ka sngap mynthi kum ka Kynhun kan sa shim ïa ka rai ba khatduh ban leit tur paidbah shapoh Secretariat ha Shillong bad ha kajuh ka por ka la maham ruh ïa ki MLA, MDC bad baroh ki Political Party jong ka Mawsynram ba kim dei ban shim ne pynlong kum ka rynsan ïalap elekshon ïa kane ka mat namar ka dei ka jingïakhun ba tyngeh jong ka Kynhun ki Sengbhalang bad ki paidbah nongshong shnong jong ka Mawsynram C&RD Block ka dang ïaid shakhmat ban pynïoh ïa ka jingdawa.