Maham ka JSU halor ba thmu leh Survey ïa ki lynti Railway shaduh Jowai

Jowai, Nohprah 07: Hadien baka sorkar kmie kala mynjur haka budget 2024-2025 ban leh Survey ïa ki ar tylli ki line (railway) ban pynpoi shaduh Jowai kawei na Jowai-Khliehriat-Chandranathpur kaba don 79km bad kaba ar ka Chaparmukh-Jowai line kaba 180km. Kumta ka Jaiñtia Students Union (JSU) Central Body kala maham jur ïa ka sokar lyngba ka North East Frontier railway( NFR) ba kam dei bam leh da ka bor ïa kane ka railway.
Ka daw ba ka Jaiñtia Students Union (JSU) ka pyrshah ïa ka railway ka long haduh mynta ym pat don ïa ki aiñ ba tikna ban teh lakam ïa ki bar jylla, namar lada ka rel ka ïoh ban wan shapoh Ri-Jaiñtia ka jingma kala ap lypa ïa kine ki lum kiba itynnad. Ka seng ka ai nuksa halor kaei kaba jia hapoh them mator bad ka rukom lum survey.
Shuh shuh ka seng kala ong ka jingdon ka rel hapoh nongbah Delhi, Assam kam wanrah jing myntoi ïa ka Meghalaya namar ka dor jong ki tiar ki tar ki long kumjuh hi. Na ka liang ka JSU kala maham ïa ka Sorkar ba kam dei bam leh bor ïa ka jingpyrshah jong u paitbah, kumjuh ruh ka JSU ka la maham ïa ka JHADC ba kam dei ban ai jingbit (NOC) lane pyndonkam bakla ïa ka bor haba ïa dei bad kane ka issue.
Haka juh ka por ka JSU ka kyrpad ïa ki Waheh Shnong, ki Sengbhalang ban ïatreilang bad ban pyrkhat bunsien hashwa ba kin ai jingkyrshan ïa kane ka issue kaba long ka ïap ka im jong ka lawei.