Shillong, Rymphang 17: Ka Dorbar Shnong Umkiang, Elaka Narpuh, East Jaiñtia Hills District, ka maham jur ïa kino kino ki Candidate ne ki riewshimet ban sam pisa hapoh ka area Shnong Umkiang naduh 6:00 janmied ka tarik 19th rymphang 2025 tad haduh ban da dep ka sngi thep vote.
Kane ka jingmaham ka long ban pynlong ïa ka jingjied nongmihkhmat sha ka District Council (JHADC) da ka lynti kaba khuid ba suba (Clean Politics), ban ailad ïa ki nongshong Shnong ban jied nongmihkhmat da ka mon laitluid khlem ka jingpynbam pisa, khnang ban wanrah ïa ka jingsynshar kaba khuid ba suba hapoh ka ri ka muluk jong ka bri u hynñiewtrep.
Kyntang ïawai, lada lap yn pynshitom katkum ka aiñ, ong ka kyrwoh ba la phah da u Bah Lasting Pala Waheh Shnong, u Bah Nicholas Lyngdoh Secretary Shnong.
