Maham ka DS Lawmali Pyllun ba jur ki kam khaïi bad dih drok, kyiad ha ki jaka jong ka shnong
Shillong, Nailar : Na ka liang ka Dorbar Shnong Lawmali Pyllun, Shillong, ka pynpaw ka jing sngewkhia kaba jur halor ka jingjyllei palat ki kam khaïi drok, kyiad bad kiwei kiwei ki jait jingdih pynbuaid kiba la nangkiew sted bha ha ki bynta jong ka ïew Polo bad hapoh shnong poh thaw bad kaba la buh ka jingma kaba khraw ïa ka imlang sahlang hi baroh kawei.
Kumta halor kane ka phang, na ka liang ka Dorbar Shnong ha u kyrwoh lyngba u Bah L. Lyngdoh Kynshi, General Secretary ka la pynmih ïa ka jingmaham ba la khang pyrshah ban pynlong jaka die lane jaka ïa dih drok, kyiad ne kiwei pat ki jait jingdih pynbuaid ha kino kino ki lynti shnong, bad la maham ruh ban ym pynïeng kali ha ka por mynmiet ha ki jaka kiba dum lane ha ki rud surok jong ka shnong da ka jingthmu ban pynlong jaka die lane jaka ïa dih drok kyiad hapoh kali ne ban ïa hylla kyrkait lane pynheh jingtem hapoh kali ha ka por mynmiet namar ka pynthut ïa ka thiah ka dem jong ki nongshong shnong.
Ka Dorbar Shnong Lawmali Pyllun ryngkat ka Seng Samla, Seng Longkmie, VDP bad ka Sport Club kan pynlong ka jingïaid shnong lane parhara ha ka shnong ha ka por mynmiet na ka bynta ban rat dynkhong ïa ki kam sniew kiba la nang jyllei hapoh shnong pohthaw.
Nalor kata ka Dorbar Shnong ka maham jur ba nangne shakhmat lada lap ïa kino kino ki briew kiba dei napoh shnong lane kiba na bar shnong kiba khaïi drok lane die kyiad hapoh u pud u sam jong ka shnong kan shim ïa ki sienjam kiba tyngeh pyrshah ïa kito kiba ju mlien ban leh ïa kitei ki kam sniew.
Ka Dorbar Shnong kala shim ruh ïa ka rai ban khang pyrshah ïa ka jingtah ia ki postar ha kino kino ki kynroh kiba don ha ki rud surok kiba hap hapoh ka shnong Lawmali Pyllun, namar man la ka snem ka Dorbar Shnong hateng hateng ka ju ai bylla sngi bad pynlong ruh ka jingïamih paidbah shnong ban pynkhuid ïa ki nala shnong, ki lynti shnong bad ban pushara ïa ki kynroh khnang ba ka shnong ka thaw kan khuid bad itynnad.Hynrei, la ju lap pynban ba mar ïa dep ka jingpynkhuid shnong tang hadien katto katne sngi la wan tah da ki postar bapher bapher ha ki kynroh surok.
Kumta nangne sha khmat na ka ling ka Dorbar Shnong ka maham ba lada lap ïa kino kino kiba wan tah postar ha ki kynroh ka Dorbar Shnong kan shim ïa ki sienjam pyrshah ïa ki.