Maham ka DC ban plie dukan palat 10 PM, mana ban tem jingrwai ha ki jaka pule

Shillong, Naitung 10: Hadien ba ka la mih ka huri hura bad ïashoh ïadat ha Laitumkhrah kaba la poi haduh u pud ba ka don ka jingshah thang kali ha phyllaw jong ka Thanad, ka Deputy Commissioner jong ka East Khasi Hills ka Kong RM Kurbah mynta ka sngi ka la pynjari ïa ka kyndon 144 CrPC ha nongbah Shillong  kum shi bynta ban teh lakam ïa kino kino ki jinghuri hura kiba lah ban mih khamtam ha ka por mynmiet.
Ha ka hukum ba la pynmih ka DC ka la  maham ba baroh ki dukan ha sor Shillong kim dei shuh ban plie palat ïa ka 10 baje mynmiet bad ruh ka la maham ba la mana ba ym bit ban dih kyiad ne kino kino ki jingdih pynbuaid bad ki kam be-aiñ hapoh kali.
Shuh shuh la mana ba ym dei ban tem  jingrwai ne kino kino ki sur pynsawa ha jan ki skul bad jaka pule, ki jaka sumar bad ruh ha ki shnong ki thaw bad ki dong ki kyntoit ka sor khamtam eh ynda la palat ïa ka 10 baje mynmiet.