Maham ka CFS ïa kiba die rud surok ban leh khuid haba die ïa ki jingbam ha ki dukan

Shillong, Ïaïong 25: Ka Commissionerate of Food Safety ka la maham ïa kiba die jingdie ha surok ba ki dei ban bud ïa ki jingbthah jong ka tnat halor ka jingdonkam ban pynbiang ïa ka bam kaba don ki jingïada, ka jingleh khuid ne ban mad ïa ki jingshah pynshitom.
Halor kane na ka liang ka Assistant Commissioner jong ka Food Safety ka Kong DBS Mukhim ka la ong ba ki nongdie harud surok kiba die ïa ki marbam ha ka nongbah ki bym bud ïa ki safety standards ba la buh da ka Food Safety Standards Authority of India (FSSAI) kin ngat ha ki jingshah pynshitom.
Ka la pyntip ba kumba ka long mynta ki dang don tang kumba 1500 ngut ki street food vendor kiba la ïoh ïa ka licence napoh ka FSSAI bad na ka liang ka ophis ka shem jingeh ban pynsngewthuh ïa kine kiba die jingdie harud surok halor ka jingdonkam ban pynneh ïa ka jingdie jingbam jong ki ban long kiba khuid ne kiba koit ba khiah bad kiba ïaid lang bad ka food standard. “Don katto katne na kiba die jingdie harud surok kim salia watba ki hap ban siew ïa ka jingshah shaiñ kuna,” ka la ong.
Ka Kong Mukhim ka la kyntu ïa ki paidbah ba kin ujor lada kiba die jingjia ki pynkheiñ ïa ki kyndon ka food safety bad ban ujor sha ka ophis jong ka. Ka la kdew ruh ba kiba die harud surok kim ju wah ïa ki licence jong ki bad kumta ka kyntu ïa ki ban pynneh ïa ka jingleh khuid ha la ki jong ki jaka die.
Ha kajuh ka por na ka liang ka Commissionerate ka la pynlong ruh ïa ki jingpynsngewthuh paidbah na ka bynta kiba sam, ki, wholesaler bad kiba die khutia.