New Delhi Rymphang 12 : Ban pynthikna ba ki riewkhuid, ki kalpavasi bad ki para bangeit ha ka Mahakumbh kim duna marbam, la sam ïa ki marbam lyngba ki kali. U Rohit Jain, u khlieh duh jong ka NAFED ha ka jylla u la ong ba kane ka skhim kaba kyrpang ka dei kaba pynïaid da ka tnad Kam Ïatreilang, khnang ban pynthikna ba ym don uno uno u para bangeit ba duna bam. U Deepak Agrawal, MD ka NAFED, u dang peit ïa kane ka kam khnang ban pynthikna ba baroh ki briew ki ïoh ïa ki marbam ha ka por kaba biang.
Ki para bangeit kiba don ha ka Mahakumbh ki lah ban pan ïa ki reshon lyngba ka jingphone ne ka WhatsApp ha u nombar 72757 81810. Ki marbam ba la pynduna dor ki kynthup u atta bad u khaw ba 10 kilo ha ka shi song, katba ïa u moong, masoor, bad chana dal la sam ha ki song ba 1 kilo. Shisien ba kine ki marbam ki poi sha ki kali, la sam mardor ïa ki sha ki ashram bad ki briew.
Haduh mynta, la dep sam 700 metric ton u atta, 350 metric ton ki shana dai (moong, masoor, bad chana dal), bad 10 metric ton u khaw. Ki mar jong ka NAFED bad ‘Bharat Brand’ ki la ïaid ïew bha ha ki para bangeit.
Lyngba kane ka skhim, ka Sorkar ka pynbiang ïa ki marbam babha sha ki million ngut ki para bangeit ha ka Mahakumbh bad ki la pynsuk ïa ka kam ban ïoh ïa kine ki marbam. Ki kali bad ki lad ban shu phone ban ïoh ïa kine ki la pynsuk bha ïa ki briew bad ki la pynthikna ka jingïaid ryntih ka Mahakumbh 2025 ha kaba baroh kiba ïashim bynta ki sakhi ïa ka jingsuk.
