Mad ka thaiñ Sohra ïa ka jinglip bording khah khah, shen yn pynpoi ïa ki transformer

Shillong, Jylliew 27 : Ka jinglip bording khah khah ha ka thaiñ Sohra ka la pynlong ïa ki Khlieh Nongsynshar Shnong ban kyntu ïa u MDC ka thain Bah Titos W Chyne ban ïa kren bad u Myntri ka tnad, u AT Mondal halor katei ka jingeh.
Kumta, na ka liang u Bah Titos ha ka step sngi Palei u la kynduh ïa u Myntri ban pynsngew markhmat ha u ïa kiba bun ki jingeh ba ka thaiñ Sohra ka kynduh halor ka bording kumba la pynsngew da ki 22 ngut ki Khlieh Nongsynshar Shnong.
“Nga la pynsngew ha u Myntri ba ka jinglip bording khah khah ha ka thaiñ Sohra ka la ktah ruh ïa ka jingwan ki nongjngohkai pyrthei namar ka Sohra ka dei ka jaka jngohkai kaba baroh ki wan,” u la ong.
Shuh shuh u la ïathuh ba ki nongwan jngohkai ki ujor ba kim kwah shuh ban sah ha Sohra namar kim ïoh shuh ban sum ban sait, ban charge ïa ki mobile bad ruh ban siew online ha ki hotel ne homestay namar ba ym don bording.
“Kaba kongsan eh kadei ïa kiba treikam lajong kum kito kiba buh ïa ki karkhana welding.” Kawei pat ka mat kadei halor ka jingduna ki nongtrei kum ki lineman kiba hap ban peit marwei bun tylli ki shnong kaba la buh jingeh bha khamtam naba ka thain ka pawnam ha ka jingjur slap bad ka jingthut khah khah ka bording.
“Ki Rangbah Shnong kinla kyrpad ruh ïa ka Department ba la kumno ki SDO ne ki Engineer ki dei ban pyntip lypa ha ki WhatsApp Group jong ki Rangbah Shnong lada donkam ban pynlip bording bun kynta ba kin ïoh pyntip ha ki shnong,” u la bynrap biang.
U MDC u la ong ruh ba ka thain ka sakhi ïa ka jingkiew palat ka bording bad ka jingslem ban pynpoi ïa ka bill bai bording kaba poi shisien lai bnai ka la ktah haduh katta katta ïa kiba duk ban siew bai bording.
Na ka liang u Bah Titos u la pyntip ruh ba na ka liang u Myntri hangto hi u la kren bad ki ophisar halor katei ka jingeh jong ka thain bad kular ruh ba mynta ne lashai kin sa pynpoi noh 9 tylli ki transformer ha ka thain Sohra.