Shillong, Jymmang 19 : Ka jinglip bording khah khah ha kiba bun ki shnong kiba hap ha ka thaiñ Sohra ka la pynlong ïa u MDC ka thaiñ ba dei ruh u Chief Executive Member (CEM) ka KHADC, Bah Titos W Chyne ban pyntip mardor sha u Myntri ka tnad Bording ba dei ruh u Symbud Myntri Rangbah ka jylla, Bah Prestone Tynsong ban phah tuklar mardor.
Ha ka shithi, u Bah Titos u la ong, “Ka la don ka jinglip bording kaba khah khah ha ka thaiñ Sohra ha kine ki khyndiat sngi kaba la buh ha ka jingeh kaba khraw ïa ki nongshong shnong. Tad haduh mynta ka bording kam pat meh satia.”
Katkum ka jingïathuh jong u, ki shnong kiba shah ktah ha katei ka jingpynlip bording ki kynthup naduh ki bynta jong ka Sohra, thaiñ Laitryngew, thaiñ Khatarshnong nalor kiwei kiwei.
“Bun ki shnong kiba mad kham bun ka por kaba lip ban ïa kaba meh,” la ong u MDC ka Sohra.
U Bah Titos u la bynrap ruh ba ka jingthut ka bording ka la ktah tyngeh ruh wat ïa ka kam jngohkai pyrthei ha ka thaiñ.
Kumta, halor kane, u kyntu jur ïa u Symbud Myntri Rangbah ban phah maramot noh kham kloi khnang ba ki paidbah kin ym mad slem ïa katei ka jingshah ktah naka jinglip bording.
