Mad jingjop ka Laitkynsew bad ka Mawphlang ha ka sngi ba-ar jong ka 5th District League T20 Cricket 2026

Saitsohpen, Rymnphang 19: Ka Laitkynsew Mission Club bad ka Mawphlang Cricket Club ki la ïoh mad jingjop ha la ki jong ki jingïalehkai jong ka lympung 5th District League T20 Cricket Tournament 2026 ba la pynïaid da ka East Khasi Hills Cricket Association (EKHCA) hynne ka sngi Palei ha Saitsohpen, Sohra.
Ka sngi ba-ar (Day 2) jong kane ka lympung ka la sakhi ïa ka Laitkynsew Mission Club kaba la jop da 28 ron pyrshah ïa ka Seng Samla Mawlong Mawriang, katba ka Mawphlang CC ka la pynliem noh da 6 wiket ïa ka Royal Rangers CC.
Haba tied nyngkong hadien ba jop ïa ka jingkynting pisa (toss) ka Laitkynsew MC ka la kamai 182 ron bad hap 8 wiket haduh kaba kut ki 20 ober, bad u Mebanrikupar Malngiang u la noh synñiang haduh 73 ron naki 35 bol.
U Stevintinison Lynrah jong ka SSM Mawriang u la khur 3/20 naki 4 ober. Hynrei haba wan ban beh ïa ka thong, ka kynhun ka la khyllem noh baroh 10 wiket tang na ka bynta 154 ron haki 17:5 ober. U Rahul Bhimsubro u la kamai 64 ron naki 32 bol.
Nalor ba u la trei borbah ha ka tied, u Mebanrikupar Malngiang u la khur ruh 3/23 naki 3.5 ober ha ka boling, kaba la pynlong ïa u ban ïoh ïa ka nam Player of the Match.
Ha ka jingïalehkai kaba bud, ka Royal Rangers CC ka la buh ïa ka thong tang 132/6 haki 20 ober. U Lalaplad Tariang u la lamkhmat ha ka tied da kaba kamai 31 ron naki 21 bol, katba u Janai Dohtdong jong ka Mawphlang CC u la khur 2/18 naki 4 ober.
Haba wan ban tied u Janai u la noh synñiang 63 ron naki 53 bol, ha kaba ka Mawphlang CC ka la pyndep ïa ka kamram ban kynjoh 133 ron da kaba hap tang 4 wiket haki 17 ober.
Wat hadien ka jingïalehkai ba kyrpang jong u Balabianglang Buhphang uba la khur 4/29 naki 4 ober, hynrei ka Royal Rangers CC kam shym la lah satia ba kan khanglad ïa ka Mawphlang ba kan khur ïa ka jingjop.
Ha kaba kut u Janai Dohtdong u la khur ïa ka khusnam Player of the Match.