Mad jingeh ki shnong ka thaiñ Mawrong bym don bording da ki taiew, leit kynduh SDO ka Synjuk ki Rangbah Shnong

Nongpoh, Naitung 27: Ki nongïalam shnong hapoh ka Synjuk ki Rangbah Shnong Ri-Bhoi District jong ka thaiñ Mawrong ha Ri-Bhoi mynta ka sngi kila leit ban ïakynduh syndon ïa u SDO ka Umsning Distribution Sub-Division, MePDCL Umsning halor ka jing thud ka bording ha kumba 10 tylli ki shnong ka thaiñ Mawrong, bala buh ïaki paidbah hapdeng ka jingeh kaba khraw ba ki hap ban shong dum la bun sngi naka jingbym shimkhia ka tnad MeECL.
Haba kren sha ki lad pathai khubor hadien ka jingleit kynduh SDO ka tnad MePDCL Umsning, naka liang u Bah BB Makdoh Chairman ka Synjuk ki Rangbah Shnong Ri-Bhoi District u la pynpaw ba kum ki nongïalam shnong kim lah shuh ban shah halor ka jingbym shimkhia ka tnad MeECL kaba khlem patiaw ïaka jingud jingnam jong ki paidbah katei ka thaiñ watla ka bording ka don sha kiwei kiwei ki shnong, hynrei ki paidbah ha katei ka thaiñ ki hap ban shong hapdeng ka jingdum bad thud ki kam ki jam bad ki jingdonkam ba bun kumba bun naki kam ki jam la hap ban pyndonkam da ka bording elektrik.
“Ngim sngew eiei lada dei ka load shedding bad lada dei ka por ba pynlip lut ha baroh kawei ka jylla lane ha Ri-Bhoi District, hynrei ka jinglip bording ha katei ka thaiñ ka long kaba kham pher namar ka lip tang sha kitei ki thaiñ, kaba dei naka jingdkut ki sainar elektrik, bad bun naki post elektrik kila buh jingma namar kila sdang ban sarang bad lah ban khyllem ha kano kano ka por” la ong u Bah Makdoh.
U la ong ruh ba katei ka jingdkut ki sainar elektrik naka por sha ka por sha katei ka thaiñ ka lah ruh ban buh ïaka jingma kaba khraw bad lah ban wanrah ka jingjia ba sngewsih ha kano kano ka por.
Namarkata naka liang ka Synjuk kala buh ka jingkyrpad sha ka tnad MeECL ba ka dei ban shimkhia mardor ha kaba ïadei bad ka jingeh ki paidbah katei ka thaiñ naka jingbym don bording bad ban thung ruh da u lineman ba pura sha katei ka thaiñ ban pynsuk ïaki paidbah, bad lada kam don kano kano ka jingshimkhia naka liang ki nongïalam shnong ryngkat ki paidbah kin mih paidbah syndon da ki shnong ban dawa naka tnad MeECl ba dei ban pynbiang bording sha katei ka thaiñ.