Shillong, Rymphang 23: Ki MLA na baroh arliang jong ka jong ka Ïingdorbar thaw aiñ ha ka sngi Nyngkong ki la buh ka jingkylla halor ka jingpyntreikam jong ka sorkar jylla ïa ka Homestay Scheme, kyrpang ha kaba ïadei bad ki nongïoh myntoi, ka jingïasyllok bad ki nongïalam shnong bad ki jingeh ba la mad da ki nongplai bad ki jingkyrshan na ki bank.
Haba wanrah ïa kane ka mat ha ka ki kynta buh jing kylli ha ka Ïingdorbar thaw aiñ jong ka jylla ki dkhot ki la kdew ba watla kane ka scheme ka don jingthmu ban kyntiew ïa ka ïoh ka kot, ka jingkiew ha ka riti dustur bad kumjuh ruh ïa ki kam jngohkai, hynrei ki nong applai ki la hap ban pyndep ïa kiba bun ki jingdonkam ba kynthup ïa ki kot ki sla bad bun ruh ki hap ban mad ïa ki jingshah pynslem.
U MLA ka VPP na Mawryngkneng u Bah Heaving Stone Kharpran u la pan ïa ki jingtip ba bniah ha kaba ïadei bad ka jingjied ïa ki jaka hapoh kane ka scheme bad la ka la don ne em kano kano ka jingïasyllok bad ki nongïalam shnong ha shwa ban pyntreikam ïa kane ka skhim.
Shuh shuh u MLA ka UDP na Shella u Bah Balajied Synrem u la pynpaw ïa ki jingeh ba la mad da ki nongïoh jingmyntoi bad bun na kiba dei ban ïoh jingmyntoi ki hap ban mad ki jingeh ha ka por ba ki shim ram wat hapdeng ba ki la pynbiang ïa ki kot ki sla ba donkam.
Katba u MLA ka Nongkrem uba dei na ka seng VPP u Bah Ardent Miller Basaiawmoit u la buh ka jingkylli halor ki jingïoh jingmyntoi na ki kam jngohkai bad hato ki la don ne em ki jingjurip ha ki kyrdan jong ki distrik.
Haba jubab ïa kane na ka liang jong u Myntri Rangbah u Conrad K. Sangma u la pyntip ïa ka Ïing ba hapoh ka Homestay Scheme la ai kyrpang ïa kito ki shnong kiba don ka jingkhring ïa kiba wan jngohkai da ka jingthmu ruh ban kyntiew ïa ki kam pynroi ha kine ki jaka.
