Mawkyrwat, Jylliew, 18: Ki paidbah jong ka thaiñ Dongriwar Manad ki la ïa kynduh jingeh ha ka ïaid ka ïeng lyngba ki kali na ka daw jong ka jingtwa khyndew jong ki surok ha kiba la shah khang lynti ïa ki surok ba ki ju pyndonkam ban ïaid manla ka sngi.
Na ka daw jong ka jingtwa khyndew ha ki surok ka la buh jingeh ïa ki paidbah jong ka Dongriwar Manad Area ba kdup ïa ki San Shnong ka Manad, Lummawbah, Pyndensoh-lang, Pyndenlyngdoh, Mawbidong.
Kumta na ka liang ki paidbah jong kine ki san shnong ki la buh ka jingkyrpad ïa ki bor ba dei peit ka PWD (Roads) ba kin phah nongpyntrei ne ki nongïarap lem ban pynkhuid ïa ki jingtwa khyndew ha shilynter ka surok khnang ba ki paidbah kin nym ïa kynduh jingeh ha ka leit ka wan lyngba ki kali ban kit ïa ki mar ki mata bad kiwei kiwei ki jingdonkam.
Kane ka jingther jong u lapbah lapsan ha kine ki khyndiat sngi ka la pyntwa lut ia ki lum ki wah ha kylleng ka jylla kat haduh ba ki paidbah ki la iakynduh jingeh ha ka leit ka wan na ka daw ka jingdkuk jong ki surok ha kylleng ki district ka jylla.
