Mad jingeh ki paidbah ba suki palat ka jingpyntrei ïa ka surok NH-6 ha Khliehriat

Khliehriat, Jylliew 12: Ka sor Khliehriat ka dei ka jaka kaba bun bha ki ophis, ki skul bad ki shlem pule bapher bapher, ka dei ka jaka ïew ba bun bha ki paidbah ba ïa die ïa thied, ka long kaba sngewlyngngoh pat ba ka National Highway Authority of India kam shym khia eiei ban pynkloi ïa ka jingpyntrei ïa kane ka surok.
Ka jingsuki palat ka jingpyntrei ïa ka surok NH-6 ha Khliehriat shisha ka la wanrah jingeh haduh katta katta ïa ka leit ka wan jong ki paidbah khamtam ki khynnah skul, ki khynnah college kiba hap ban beh por namar ka jingjur palat ka jingdheng kali kaba man la ka sngi, kito ki khynnah kiba ïaid da ka kjat pat ki hap ban ïaid ha ka ktieh bad ka pum pum ha por ba rang, hato kane kam buh jingeh mo ïa ki khynnah?, ka lah ban ktah ruh wat ïa ka koit ka khiah jong ki lada la jur palat ka pum pum khyndew, kane ka buh jingeh ruh wat ïa kito ki kali ba kit nongpang kiba donkam ban pynpoi kyrkieh ïa kiba pang ba shitom sha ki jaka sumar kum sha Jowai bad sha Shillong.
La sakhi ruh ba ki nongtrei kiba pyntrei ïa ka surok ruh ki duna bha, kane ka jingsuki ban trei pyndep ïa ka surok ka la buh jingeh ruh wat ïa kito ki nongdie nong thied ha ïew bad ha sor Khliehriat, shuh shuh ka long kaba la i sohsat ruh ban ïohi ba ha ka por ba rang ka la jur sa tang ka pum pum khyndew kaba mih na surok bah bad ha ka por ba slap pat ka la jur sa tang ka khyndew ktieh bad don ki bynta ba jur ka jyrsieh ruh, shuh shuh ha Khliehriat kata naduh jan DC ophis shaduh jan Lad Sutnga ki don ki bynta ba ka surok ktieh ka la long thliew bad buh jingma ïa ki kali ba ïaid na kane ka bynta khamtam ki kali rit.
Ka jingpyntrei ïa kane ka surok ha Khliehriat kam shym la urlong ruh kumba la dep buh por da u Deputy Commissioner, kumta ka long kaba donkam ba ki bor pynïaid district jong ka East Jaiñtia ki dei ban shim khia bha ïa kane khnang ba kan ym buh jingeh than ïa kiba leit ba wan bad ïa kiba die ba thied ha Khliehriat.