Mad jingeh ki paidbah ba pynslem maramot ka CPWD ïa ar tylli ki jingkieng ha khappud

Khliehriat, Naitung 18: Hapoh une u snem 2022 ar tylli ki jingkieng kiba kongsan kiba don ha ki thaiñ khappud ha East Jaiñtia Hills District ki la julor bad pra ha ka jingwan lynshop ki bor ka mariang bad ka um kaba heh ka ka kit lut ploiñ ïa ki tei ki jingkieng, kawei ka dei ka jingkieng hajan ka shnong Shymplong bad kawei pat ka dei ka jingkieng ha Lahaleiñ, ki nongshongshnong jong ki thaiñ khappud ki la ïathuh ba mynta ki ïakynduh jingeh hauh katta katta ha ka leit ka wan, ha ka kit ka bah bad khamtam eh haba wan lap ka pang ka shnitom.
Ki nongshongshong ki la pynpaw ka jingsngew diaw halor ka jingbym shim khia kloi ka tnat C.P.W.D ban maramot lane ban shna noh da kiwei ki jingkieng ha kitei ki ar tylli ki jaka “Hooid na ka liang ki bor synshar district jong ka East Jaiñtia Hills District, lyngba u Deputy Commissioner, u Abhilash Banarwal, IAS mar mar u la shim khia ban phah jingthoh bad bthah ïa ka tnat CPWD ban maramot noh ïa kitei ki ar tylli ki jingkieng kiba ha Shymplong bad ha Lahaleiñ, hynrei ngim lah pat ban tip na kaei ka daw ba ka sorkar bad ka tnat kim treh ban shim khia ban maramot bad leh bym salia ïa ngi ki nongshong shnong kiba ha ki thaiñ khappud bad ka ri Bangladesh, ngi ïakynduh jingeh haduh katta katta ha ka kit ka bah bad haba wan ka pang ka shitom namar ka jingbym lait shuh ki kali ban ïaid na kitei ki jingkieng kiba la julor” pynpaw ki nongshnongshnong ka thaiñ.
Ki la kynthoh ruh ba kane ka jingleh bym salia ka sorkar bad ka tnat C.P.W.D ka long kumba ki ibeiñ bad iehnoh beiñ ïa ka thaiñ, kaba ha ka jingshisha ki paidbah jong ka thaiñ khappud ka donkam haduh katta katta ïa ka jingïarap, ka jingkyrshan ba radbah jong ka sorkar bad ka tnat CPWD, la ong ba ka jingleh mynti jong ka sorkar bad ka tnat ka wanrah ïa ka jingduh jingkyrmen bad jingsah dien ka thaiñ, namar ka surok ka dei u budlum jong ka roi ka par bad kyntiew shuh shuh ïa ka ioh ka kot jong ki paidbah.
Kum ban shu pynkynmaw, ka jingkieng kaba 16.5 mitar ka jingjrong kaba ju iaid ki paidbah ha thaiñ khappud kaba don hajan ka shnong Shymplong, hajan Sonapyrdi ( RCC Bridge No 54/1), myn ha ka 17 tarik u iaiong 2022 ka la dkhut ar liang bad ka um kaba lat-lat ka la rong noh ploiñ ïa ka jingkieng, ka jingdkhut noh kane ka jingkieng kala buh jingeh haduh katta katta ïa ki paidbah ha ki thaiñ khappud, namar na kane ka jingkieng ki paidbah jong ka shnong Shymplong, Huroi, Hingaria, Lejri, Lahaleiñ bad kiwei kiwei ki shnong ba khappud ki ju ïaid lyngba.
Kumjuh ruh myn ha ka 7 tarik u naitung 2022 ka jingkieng kaba don ha ka wah Ïakang ha shnong Lahaleiñ ka la dkut bad pra bad ka um ka la kit lut ploiñ ïa ka jingkieng baroh kawei, mynta ki briew ki la shu ïaid da ka kjat na kawei ka jingkieng ba ki shu shna hi da ki dieng tylli tang ba kin lait ban jam sha shiliang.
Ha kaba iakren bad ki paidbah jong ka thaiñ khappud, la sngewthuh ba ki ïakynduh jingeh haduh katta katta ha ka leit ka wan bad khamtam eh ki la ïakynduh mawsiang ha kaba pynpoi ïa ki mar rep jong ki sha ki jaka ïew, kumba baroh ngi tip ba ka tei ka thaiñ ka dei kaba ju pynmih ïa ki mar rep kum u kwai, u tympew, ki soh, u synsar bad kiwei kiwei ki jait mar rep, na kata ka daw lehse ka jingbym biang ki lynti ki syngkieng (jingkieng) ka ktah ruh ïa ka ioh ka kot jong ki paidbah ka thaiñ.