Khliehriat Iaïong 20: Ka jingther jong u lapbah uba jur bad ka jinghap phria kaba la jia myn ha kine ki Khyndiat sngi ka la pynjulor ïa ka shnong Wahïajer ha East Jaiñtia Hills District , ha kaba bun ki ïing ki sem bad ki jingdon jingem ki la julor. Kane ka jinglong jong ka mariang ka la wanrah ruh ïa ka jingduh kaba jur ïa ka karkhana dewbilat ka JUD Cement kaba don ha Wahiajer, East Jaiñtia Hills District.
Na ka daw jong ka jingjur jong u slap ka um ka la ïoh ban rung wat shapoh jong ka Cement Plant bad tap lut wat ïa ki tiar ki tar bad ka colony baroh kawei ka la shah pynjulor. Ka la don ka jingkyllem jong ki dieng kiba heh bad ki nongap pahara ki la mynsaw bad ka jaka ap pahara jong ki ruh ka la la julor.
Ka ophis jong ka Human Resource department jong ka JUD Cement kala shah rat lut baroh bad lahap ban pynsangeh lut ïa ki kam baroh. Ki nongrim jong kiba bun ki jingtei ki la shah rong lut bad kane ka buh jingma wat ïa ki jingtei ne building ruh. Ka jingrung jong ka um sha jaka ba don ki tiar pynmih dewbilat (raw material) ka la wanrah ïa ka jingduhnong kaba khraw.
Ka jinglait na kane ka aïom slap la i kum ba kam don lad ha kane ka kynti, kumba ka India Meteorologial Department (IED) ka dang ïai ïathuh lypa bad ka jingjur slap kan dang ïai bteng ha kine ki san sngi ban wan. La ong ruh ba kan don ka jingjur slap ha ka jylla Assam bad Meghalaya na ka jingbeh jong ka lyer na Bay of Bengal.
