Nongstoiñ, Jylliew 15: Ha ka step phyrngap jong ka sngi palei ha ka por kumba lai shiteng mynstep, ka erïong erngit ka la lynshop ha kylleng ki jaka jong ka West Khasi Hills ha kaba ki jingthung jingtep ki la julor lut kynthup ruh ïa ki ïing ki sem.“Kawei na ki shnong ha West Khasi Hills kaba la shah ktah jur ha ka jinglynshop jong ka eriong ka dei ka shnong Mawrok kaba jngai tang kumba lai kilomitar na Mawliehbah Mawnar. Hadien ba la ïoh jingtip u nongthoh khubor u la leit sha katei ka shnong ba peit ïa ka jinglong jingman, ha kaba la lap ba ki khlaw ki la julor thiaw, ki dieng ki la dkut, ki electric polls ki la khyllem.“Ha katei ka sngi la leit ban ïakynduh nyngkong ïa u bah Ambrose Langrin sordar jong katei ka shnong bad la ïaleit lang ban peit ïa ki ïing jong ki nongshong shnong, ha kaba la lap ba hynriew tylli ki ïing ba kynthup ïa ka ïing jong u bah Samuel Mangu, Shestar Ryntathiang, kong BertilaMyrthong, bah Jriak Mawlong, bah Besking Shangoi bad bah Pholdingstar Langrin.“La lap ruh ba ki sem masi, ki jingthung jingtep kum ki riewhadem, ki jhur ki jhep, ki diengsoh ba bun jait ki dieng kait ki la kyllon plain. La lap ruh ba haduh lai tylli ki electric polls kiba hajan ki ïing briew ki la kyllon ha madan. Nalorkata la ïoh jingtip ruh ba ar tylli ki ïing ha ka shnong Kaitkohram kaba don ha katei ka thaiñ ki la julor.“U bah Ambrorse Langrin hadien ba la wan phai na ka jingleit peit ïa ki longïing ha katei ka shnong, u la leit ban ïakynduh ïa ki ophisar sorkar ha Nongstoiñ na ka bynta ban ai jingkheiñ ïa ka jing julor jong ki ïing ki sem bad ki jingthung jingtep.“Ka jinglynshop jong ka erïong erngit ka la ktah haduh katta katta ym tang ïa katei ka shnong Mawrok, hynrei ïa ki jingthung jingtep jong kiwei pat ki nongshong shnong ha kylleng ki jaka khamtam eh ïa u riewhadem, namar ka dang dei ka por ba u dang sdang sei syntiew.“Ki nongrep riew hadem ha kylleng ki shnong ki la sngew bynñiaw haduh katta katta, namar ha ka por ba u dang sdang san, ki khñiang ki la pynjulor bad mynta sa ka erïong bad ka la pynduh jingkyrmen haduh katta katta ïa baroh ki nongrep.
