Nongstoiñ, K’lyngkot 06 : Katba nang mih ki sngi ka West Khasi hills ka la nang kiew ha ka jingbun briew ki shnong ki thaw ki la nang bun pait hynrei kat kum ka jingwad jingtip jong u nongthohkhubor na man la ki shnong ki thaw kiba hap hapoh ka West Khasi hills la lap ba 75% na ki nong shong shnong ki dei kiba dang im ha ka rep ka riang bad ka bylla ka sngi.
Haba pyrshang ban twad jingmut na ki nongshong shnong na man la ki jaka ka jubab kaba ki ai ka long kaba sngew myllung bha namar na ki nongshong shnong baroh ym don satia iwei ruh uba ai ka jubab kaba ong ba ki dap ki biang, ki pahuh ki pahai hynrei tang ki jingduna suda. Kaba kham sngew synei bad ka long ruh kaba shisha ba ki nongshong shnong ki jubab ka long ba haba ki ri jingri kum ki sniang, ki syiar, ki blang ki nongthied ki khñiot ïa ka dor kat haduh ba ym lon wat tang ban ïakren ruh.
Uwei na ki nongri sniang u la ong ba kaba lyngoh ka long ba ha kine ki sngi ka doh sniang ka poi haduh san spah shi kilo hynrei ki nongot doh haba ki wan thied sniang na ki nong ri ïa u sniang uba khia laiphew kilo ki pan ha ka dor hynñiew haduh phra hajar tyngka lait nangta kim treh shuh. Ki nongdie jhur pat lada leit die ki nongrep ïa u tyrso ki thied lai tyngka shi khum katba lada leit thied ki paidbah pat ki die ha ka dor arphew tyngka lai khum.
Uwei u nongrep sying pat haba kylli katno ka dor ka poi ha kine ki sngi u la ong ba ki barjylla ha ïew Hahim te ki thied ha ka dor arphewtyngka shi kilo kata phraspah tyngka shimon katba kiba wan thied na shnong pat ki thied hynriewspah tyngka shi mon. Haba ïakren bad ki nongrep synsar pat ki la ong ba lada ka long kum ha u snem ba la dep te ban rep synsar kam don jingmut shuh namar ym don nongthied lada leit kit haduh Shillong ruh tang ka bai kali kam mih satia
Haba pyrshang ban twad jingmut na ki nongdie jingdie ha ki ïew ki hat kum ha Nongstoiñ, Riangdo Shalang, Rambrai bad kiwei kiwei ki ïew hapoh ka district ki la ong ba ka jinghiar ka ïew ka hat ha kine ki snem naduh u snem 2020 haduh mynta ka la ong kaba palat liam.
Ki la ong ruh ba haba leit die jingdie ha ki ïew don teng teng wat tang ka bai sha sngi ruh ym ioh. Uwei na ki nongdie jaiñ u la ong ba ka jinghiar palat jong kaïew imat ka dei namar ba ki mar kiba wan rah na sha bar ka jylla ki nang kiewdor ma ka sngi katba ki mar ba pynmih da ki nongrep napoh ka jylla ki nang hiar arsut ha ka dor ka mur haduh ba ki nongrep ki la sdang thait ban trei shitom wat la ki rep ruh ki shu rep tang ban biang ha ïing ha sem.
