Shillong, Naitung 4 : Ki paid nongshong shnong jongka nongbah Shillong bad wat ki nongpynmih kot khubor ki la lynñiar bad mad ïa ki jingeh na kane ka jingpynlip bording ba saw kynta lynter jongka MeECL kaba sdang naduh ka por 1 baje mynstep phyrngap bad kut haduh kapor 5 baje.
Ki paidbah ki la pynpaw ba nalor ba la jur palat ka jingshah tuh shah thiem hynrei kane ka jingpynlip bor ding ka la nang ailad shuh shuh ïa ki nongtuh nonglute ban ïoh leh katba ki mon ha ki jingdum jongka miet. Ym tang katta ki la pynpaw ruh ba kane ka la ktah jur ïaki khun ki kti jongki kiba ju myllien ban khreh kot ha ka por miet bad kiba khie ruh dang step synnia ban pule kot.
Ki la pynpaw la kumno kumno ruh ka sorkar ka la dei ban pynlip bor ding shi kynta duh ha ka por miet bad nangta sa bate ïa ki kynta kiba sah ha ka por mynsngi bad wat por janmiet ruh hynrei ban shu pynlip bor ding lynter kam long kaba dei.
Kumjuh ruh na ka liang ki nongpynmih kot khubor ki la pynpaw ïa ka jingeh kaba khraw namar kine ki dei ki kynta ban shon ïa ki kot khubor. Hooid ki Generator ki don tangba ka jingrem ka bai umphniang ka la ktah jur ban shon ïa ki kot khubor man la ka miet da ki generator. Kine ruh ki la pynpaw ka jingeh kaba khraw ban shu pynlip bording lynter. Ha ka jingshisha lada dei tang shi kynta ne ar kynta ruh ka dang biang hi hynrei haduh saw kynta te ka la ktah palat.
Ki paidbah bad wat ki nongpynmih kot khubor ki la pynpaw ba lada pynlip tang naduh 1 baje haduh 2 baje mynstep bad sa bteng pat mynsngi bad janmiet ruh ka biang hi kata mynstep lada 10 haduh 12 baje ruh ka dang biang bad janmiet pat 4 haduh 5 lane 5 haduh 6 baje ruh ka dang biang namar baroh ka la long hi saw kynta.
Na ka liang u Myntri Rangbah mynta ka sngi u la ong baka sorkar ka dang pyrshang ban thaw lad ban pynduna ïa kane ka jingpynlip bording haka jylla.
“ Ngi la pynkhreh mynta ban pynkylla wat ïa ka por pynlip bording bad halor kane la bthah ïa ki bor ka MeECL ban bishar bniah ïa ka por pynlip bording.
U la ïathuh ba ki don ar tylli ki jaka pynmih bor ding ba ki mashin ki thut kata ha Leshka bad ha Umiam bad nalor kata pat lai tylli ki mashin jong ki National Company kiba ai bording sha ka jylla ruh ki thut. Kumta kane ka la ktah jur bha bad hap ban shim ïa kane ka rai ban pynlip bording. Ka jingmaramot ïa ki ka dang ïaid bad la kyrmen skhem ba shen kin sa treikam biang.
