Lynguh ka madan Polo ha ka sngi kut ka tamasa Cherry Blossom

Shillong, Naiwieng 16: Ka tamasa Shillong Cherry Blossom 2025 ka la kut noh ha ka miet sngi Saitjaiñ kaba la pynskhem ïa ka kyrdan jong ka jylla Meghalaya kum kawei na ki nongïalam hapoh ka ri India ha ka ïoh ka kot.
La ïohi ba ha kine ki ar sngi jong ka tamasa, kala don ka jingpynbyrngia na ki nongrwai bad ki kynhun tem kiba nabar bad la pyni ïa ka sap ka phong da ki nongrwai bad kynhun tem napoh ka jylla kaba la pyninam ruh ïa ka jingriewspah ka kolshor, kaba la kyntiew ruh ïa ka kamai kajih lyngba ka kam jngohkai bad ka jingkiew ka ïoh ka kot bad kiwei.
La ïohi ruh ba da kiba bun byllien ki paitbah kila ïatuid sha ka Jawaharlal Nehru Stadium bad ka Cultural Arena kiba la don ha kylleng ka Shillong, kaba kane ka tamasa sa shisien kala pynshisha ba ka Meghalaya ïa ka jinglah ban pynlong ïa ki tamasa bad Concert kaba heh ha ka ri India.
Kane ka tamasa ka la sdang da ka jingplie u Myntri Rangbah ka jylla u Conrad K. Sangma uba la pynpaw ïa ka jingïohi jngai ka sorkar ban pynlong ïa ka Cherry Blossom Festival.
Ha ka por janmiet, kane ka tamasa ka la don ïa ka jingpynisap bad ka jingpynbyrngia na ka nongak phlim Bollywood ba pawnam ka Nora Fatehi bad la nang pynshongshit shuh shuh da ka kynhun tem kaba pawnam ha ka pyrthei ‘The Script’, ha kaba ki paitbah ki la ïarwai lang da ka jingkmen ïa ka jingrwai “Hall of Fame”.
La pynkut ïa kane ka tamasa ha ka miet kaba nyngkong da u nongrwai Pop bapawnam u Jason Derulo, uba la rwai ïa ka jingrwai “Swalla” bad “Savage Love,” ha kaba kane ka stadium ka la sawa jam ïa ki sur jingrwai bad ka jingmeh jingthaba jong ki LED Wristbands.
Haba phai pat sha ka Japan Arena kaba don ha Ward’s Lake ka la plie lad ïa ki nongwankai ba kin sakhi ïa ka kolshor ba kyrpang, ki jingpyninam ki bapher bapher, ki jingdro bad kiwei kiwei kiba la pynkhreh.
Ha ka sngi ka baar, ïa ka tamasa la sdang da ka nongrwai ba pawnam ka jylla ka Meba Ofilia bad hadien kane ka la don ka jingpyninam bad jingpynsngew tynnad na ka Japan’s Drum Tao bad DJ Kennedy. Hadien kane kala don ruh ka jingrwai kyrpang kum shi bynta ban kynmaw burom ïa u nongrwai ba pawnam ka ri u Zubeen Garg ha kaba bun na ki nongpeitkai ki la ïa rwai lang ïa ka jingrwai ‘Mayabini’, ïa kaba la wan ban rwai da u Zublee Baruah, Prabin Borah, Priyanka Bharali bad Arupjyoti Baruah.
Ki paitbah kila sdang ban shongshit bha, haba ka kynhun tem kaba pawnam ka Aqua ka la pynbyrngia bad pynlong ïa ki paidbah ban shad ïa ka jingrwai kaba pawnam “Barbie Girl,” katba u nongrwai hip-hop u Tyga ula pynshongshit ïa ki paitbah da ka jingrwai “Swish,” “Dip,” bad “Ayy Ladies.”
La pynkut pat ïa kane ka jingïatem ïaput da u Diplo, uba la ïoh khur lai sien ïa ka khusnam Grammy uba la pynkylla ïa kane ka madan kum ka jaka shad lyngba ki jingtem DJ jong u bad ka la don ruh ka jingtem DJ na u DJ Zethan bad Arius kaba la pynthikna ba ki paitbah kin shongshit ha kane ka miet.
Ha kane ka sngi la don ruh ka jingpynsngewtynnad ïa ki paitbah da ka jingpyninam ïa ka Cosplay, ka jingbuh ïa ki dukan bam ki bapher bapher, ki jingthaiñ kti bad kiwei kiwei kum ka jingpyninam ïa ka jingriewspah ka kolshor ka jylla. Ki kynhun kiba la ïoh ïashimbynta ha ka tamasa kidei ruh kiba la ïoh ban pyni ïa ka sap ka phong ka jong ki lyngba ka jingkyrshan kaba ki la ïoh na ka CM Meghalaya Grassroots Music Project (MGMP).
Ka Tamasa Shillong Cherry Blossom ka la kylla long ka tamasa kaba heh kaba la khring ïa ki nongrwai kiba pawnam na kylleng ki ri kum u Akon, Clean Bandit, Boney M, Ne-Yo bad mynta ïa u Diplo, Tyga, Aqua bad Jason Derulo.
Da ka jingïohlad ruh jong ki trai jylla ban pyni ïa la ka sap ka phong ryngkat lang bad ki nongrwai kiba na kylleng ki ri, kane ka tamasa kam dei satia tang ka tamasa jong ka tem ka put hynrei ka la kyntiew ruh ïa ka ïoh ka kot ka jylla lyngba ka kam jngohkai pyrthei, kaba plie lad ban aikam aijam bad ban buh ïa ka Meghalaya ha ka kyrdan kum ka jaka pdeng kaba biang tam kaba don ruh ïa ka kyrdan ha ka pyrthei ban ïohmad ïa ka riti dustur bad ka kolshor.