Lyngshop ka er ïong Sitrang julor ka ïing skul bad bun kiwei pat ki jingjulor ha shnong khappud ha Hingaria

Khliehriat Risaw 26 : Ka er ïong Sitrang kaba wan beh kyrthep myn ha ka 24 tarik mynta u bnai ka la pynjulor ïa ka ïing skul Lower Primary ha shnong khappud ha Hingaria, East Jaiñtia Hills District ha kaba ki khynnah kim long shuh ban shong hapoh skul, kane ka er ïong ka la kit lut ïa ki tin ba sop ïa ka ïing skul, pyn kylla lut ïa ki miej, ki shuki bad ki ben bad ka um slap ka la rung sha ki kamra klas.
Ym tang katta, ka er ïong ka pynjulor ruh ïa ki katto katne ki ïing shong jong ki briew bad kit lut ploiñ ïa ki tin sop ïing, ki dkhot jong ki long iïng ba shah ktah ki hap ban wad jaka rieh ha ïing ki para marjan namar ym long shuh ban shong ban sah hapoh iing namar ka um slap ka la rung hapoh ïing.
Shuh shuh, la ong ba ka er ïong Sitrang, ka la ktah ruh ïa ki jaka rep kiba don ha shnong Hingaria, ha kaba kiba bun ki dieng kwai, ki dieng soh, ki la khyllem bad kiwei kiwei ki mar rep kum ki tympew bad kiwei kiwei ki la shah ktah.
Na ka liang ka Dorbar Shnong Hingaria, lyngba u Waheh Shnong Hingaria, u bah T.Khonlah, u la kyrpad ïa ka sorkar ba kan sngewbha ban peit lem halor kane ka jingshah ktah ka ïing skul, ki ïing briew bad ki jaka rep, na ka liang ka shnong ka kyntu jur ïa ka sorkar ban kham pynkloi ka jingiarap khamtam ïa ka skul Lower Primary khnang ban dup lah ban ïoh pynlong skul biang ba ki khynnah kin nym duh skul than.
Kumjuh ruh ban ïarap lem ha kaba ïadei bad ka jingshah ktah ki jaka rep namar ka jingshah ktah ki jaka rep ka ktah ïa ka kamai kajih.