Shillong, Naiwieng 22: Ka jingsam skim pahuh ki MLA bad khamtam ka jingkhoh reh ka sorkar ban sam skhim bad ban plie Block ha ka jylla.
Ki paidbah kiba la ïoh ban ïakren bad u nongthoh khubor ki la pynpaw ka jinglyngngoh halor kane ka jingsam skhim kaba ha kine ki saw snem tam kam shym la paw dak eiei lane ka shu long teng khat lano. Kiba ki la mynjur bad ka jingkren u Myntri Rangbah Symbud ka jylla, u Bah Prestone Tynsong, uba la ong, “Ngi pynbieit shisien man la ka ka san snem, bad ki paidbah ruh ki bieit beit”.
Tang hapoh shi bnai u Myntri Rangbah u la plie lai tylli ki C&RD Block bad ki ban dang plie shuh ruh ki dang don ha kine ki sngi ban wan. Ym tang katta ka jingplie mawnongrim ban tei ïa ki ophis Block ba thymmai ruh ka la ïaid la jan man ka taiew.
Kaba kham jur na ki skhim ba la sam kadei ka jingsam ïa ki skhim jong ki nongrep lyngba ka Farmers Collectivization For Upscaling Production and Marketing System (FOCUS) kaba dei ka skhim ba sam sha ki Producer Group, ne kita ki Group ba la phah thaw da ka sorkar ban ai jingïarap ïa ki paidbah ba im ha ka rep ka riang.
Hynrei ki don ki dkhot jong kine ki Producer Group kiba la kynnoh ba ka jingsam ne ka jingpyllait pisa sha kine ki Group ruh kadei kaba leh politik namar ba la sam nyngkong shuwa sha ki Constituency ba long MLA na ka Seng NPP. Katba ha kiwei pat ki Constituency ba long MLA da ki bym dei na ka NPP pat ka jingsam ka long suki bad don lei ki Constituency kiba ym pat samn satia.
Shuh shuh ki paidbah ki la pynpaw ba kane ka jingleh jong ki MLA bad jong ka sorkar ka pynpaw ba kim kheiñ snep ïa ki paidbah ha kiwei pat ki por, hynrei ki kheiñ kor tang ha ka por elekshon. “Kane ka pynpaw ïa ka jinglong mutlop ki nongmihkhmat bad jong ka sorkar ruh kumjuh namar kane ka jingleh jong ki”, la ong ki paidbah.
Nangta ki la ong ruh ba ka pynskhem shuh shuh ïa ka jingong ba ki MLA ne ka sorkar ki treikam tang shuwa ka elekshon bad ka jingtreikam jong ki kam dei eh ban wanrah ïa ka roi ka par ha ka jylla, hynrei ka jingtreikam jong ki ka long tang ban jop elekshon.
