Nongstoiñ, Ïaiong, 17: Naduh ba ka khlam covid 19 ka la wan lyngshop ha ka jylla, ki paidbah nongshong shnong ki la mad shibun ki jingeh la ka long ha kamai kajih, ha ka ïoh ka kot, ka pule puthi, ka bylla ka sngi bad baroh ki bynta kiba ïadei bad ka jingim ba man ka sngi.
Ha kine ki sngi kawei pat ka jingeh kaba ktah ïa ki paidbah ka dei ka jingpynslem jong ka sorkar ban siew ïa ka bai bam jong ki tymmen kiba la hynriew phew snem shaneng kaba la bei pisa da ka sorkar pdeng lyngba ka Old Age Pension Scheme.
Ha kaba ïadei bad katei ka jingeh la ïoh ban ïakren bad u paieit E.Lyngkhoi 81 snem ka karta na ka shnong Siejlieh, ha kaba u la pynpaw ka jinglyngngoh haduh katta katta ïa ka jingpynslem jong ka sorkar ban siew ïa katei ka bai bam jong ki riew tymmen namar ha kne ki bnai ba la leit noh baroh ki ju ïoh man la u bnai hynrei mynta la lai bnai kynthih kim pat ïoh satia ïa katei bai bam tymmen.
U la ong ruh ba kiba bun ki tymmen kiba la palat ïa ka hynñiew phew snem ka karta ki dei kba duk hynrei ki donkam shibun ka pisa ban pynlut ha kaba thied ïa ki jingbam ba tei met khamtam kito kiba ki khun ki ksiew jong ki, ki im tang da kaba bylla sngi.
U la ong ruh ba lada ki dei ki riew tymmen kiba don ïa ki khun ki ksiew kiba ïoh ba kot te kim da khuslai than. U la ong ruh ba la kumno kumno ka sorkar ka dei ban shimkhia ïa kane namar lada ka leh beiñ ïa ki tymmen bapli ka long ka pop kaba khraw.
