Lyngngoh ki paidbah ba sahkut ka jingmaramot ïa ka surok Nongstoiñ-Mawkawah

Nongstoiñ, K’lyngkot 14: Kiba bun ba lang ki sah ha ka lyngngoh balei ka jingmaramot ïa ka surok na iew Nongstoiñ shaduh shnong Mawkawah, ka la shu sahkut wat haba la dep ban mang ïa ka pisa tyngka naduh ka 27 tarik u Jymmang 2025, kaba shong dor kumba T.88,20,000 tyngka ei ei.
Ki riew paidbah khamtam kito kiba dei ïaid ïa kane ka surok man ka sngi shaduh Mawkawah, ki la ju ud ju nam bha namar ka jingjot rathai jong kane ka surok hapoh sor Nongstoiñ ka la long sha ba palat. Ka jingeh ka long ïa ki kali kiba ïaid lyngba kane ka surok khamtam ha Nongrim, kaba ka jaka ka long thiep bha.
Halor ka jingud ki paidbah bad ka jingïoh jingtip kaba biang halor kane ka surok lem bad ka mang tyngka naduh u snem ba ka lah, ki dkhot nongïalam ka seng Federation of Khasi Jaiñtia & Garo People (FKJGP) hynne ka sngi 14 tarik Kyllalyngkot 2026, ki la leit ban tynruh sha u Executive Engineer bad dawa ruh ba u dei ban pynkloi ban pyntrei noh ïa kane ka surok kaba donkam eh hapoh sor Nongstoiñ.
Ki nongïalam ka seng ki la ong ba kane ka surok kaba la tip kum ka ‘Rehabilitation of Nongstoiñ-Mawkawah Road including construction of Parking Place (0-2.60 Km)’, katkum ba la paw ha ka Tender lyngba u Chief Engineer PWD (Roads Meghalaya, Shillong, Dated: Shillong, the: 6th May 2025 (Room No. 10), from th 13th May 2025 upto 3:00 Pm and Last date received up to 3:00 Pm of 27th May 2025′, la mang haduh T. 88,20,000/-.
Kumta ka seng ka dap da ka jingsngew lyngngoh namar haduh mynta la jan shi snem duna ym pat ïohi dak ei ei. Ka Seng ka kyrpad ïa ka Office ban shimkhia mardor ban pyntrei ïa ka tei ka surok khnang ba ki paidbah ka thaiñ kin ïoh jingmyntoi.Namar ka surok ka dei u budlum ïa ka ïoh ka kot jong ki paidbah ha ka thaiñ bad ka Jylla baroh kawei.
Na ka liang u Executive Engineer Bah D.Rani haba ïakren markhmat bad ki nongïalam jong ka seng, u la kubur ba la dep mang ïa ka pisa tyngka bad la dep aiti ruh ha u contractor. Ym tang katta u EE markhmat ki dkhot ka seng u la phone ruh ïa u contractor u ba la shu tip ba u dei na Ri Bhoi District, ha kaba u contractor u la kular ban sdang noh shen ïa ka kam.
Ki nongïalam jong ka FKJGP Upper New Nongstoiñ Unit lyngba u bah Nelson Marthong President bad u bah Droiñing Ïawphniaw General Secretary, ki la pynpaw shai ruh ba lada ka kam ka dang slem, kim banse ban leh ïa kaba donkam kum ki nongtrei ïa ka bha ka miat ha ka imlang sahlang.