Lyngngoh ka NHDC bym jubab u SMR halor ka surok bah na Lad Mawreng – Mawkyrwat – Ranikor

Mawkyrwat, Nohprah 01, 2025: Ka National Highway Demand Committee, South West Khasi Hills District ka la pynpaw ïa ka jinglyngngoh kaba khraw halor ka jingbym jubab bad sngap mynti jong u bah Prestone Tynsong uba dei u Symbud Myntri Rangbah jong ka Jylla bad uba dei peit ïa ka tnat PWD, watla kane ka kynhun ka la leit buh ‘appointment’ ban ïakynduh ïa u la ar sien ar wat ban ïakren bad ïamir jingmut halor ka jingangnud jong ki paitbah ka South West Khasi Hills District mynta la palat da ki phew snem ban ïoh ïa ka surokbah ne ka surok National Highway kaba dei naduh na Lad Mawreng – Mawkyrwat ter ter haduh Ranikor.
U Bah Kynpham V. Kharlyngdoh kum u Chairman jong ka National Highway Demand Committee, South West Khasi Hills District haba kren ha ki lad pathai khubor hadien ka jingïalang ba la pynlong ha Mawkyrwat, u la ïathuh ba ka kynhun la arsien arwat ka la leit buh ‘appointment’ ban rah ïa kane ka mat ha u Symbud Myntri Rangbah jong ka Jylla, hynrei kim shym la ïohlad satia ban ïakynduh na ka daw ba u Symbud Myntri Rangbah um shym la ai jubab watla ki la kyrpad ruh wat ïa u MLA ka Mawkyrwat, u bah Renikton Lyngdoh Tongkhar bad u MLA ka Ranikor u Bah Pius Marweiñ ban ïarap lem bad kumjuh ki la leit ïakynduh ruh wat ïa u Personal Assistant jong u, hynrei kam shym la seisoh satia.
Kumta, kane ka National Highway Demand Committee mynta ka sngi ka 29 tarik u Naiwieng, 2025 ka la shim biang sa shisien ïa ka rai ban leit buh ‘appointment’ biang sa shisien, bad lada u Symbud Myntri Rangbah um patiaw ne um kwah halor ka jingkyrpad ban ïakynduh, na ka liang ka kynhun kam banse ban shim da kawei pat ka sienjam ban ïoh pynsngew ïa kane ka jingangnud ki paitbah ka South West Khasi Hills District.