Shillong, Naiwieng 24: Ka Meghalaya and Greater Shillong Progressive Hawkers and Street Vendors Association (MGSPHSV) bad ki dkhot jong ka kiba dei ruh ki dkhot ha ka PTVC ki la pynpaw ïa ka jingsngew lynngoh ban ïohi ïa ka Notification (SMB/TVC/389/2025-26/91/91) dt. 14/11/2025, kaba la pynmih ha ki lad pathai khubor ba la soi da u ADC East Khasi Hills cum Secy PTVC.
Na ka liang ka seng ka la ong ba kam shym don kano kano ka jingïakren ha shwa ban pynmih ïa kane ka jingpynbna bad kam shym la don satia ka rai ha kaba ïadei bad kane ka jingpynbna.
“Kam shym la don ka jingïasyllok ha kaba ïadei bad ka jingbuh ïa ka Committee bad kumjuh ruh ka jingbuh ïa ka tarik halor ka PTVC. Wat hapdeng ka jingshisha ba kyrpad ban don ka jingïasyllok ha kaba ïadei bad kine ki jingdawa bad ka jingdonkam ban don ïa ka SOP ha kaba ïadei bad ki jingkam bad ki jingpyrshah, hynrei kine baroh ki la shukut khlem don ka jingïasyllok bad kane ka la wanrah ka jingeh kaba khraw ïa kiba die madan ha Khyndailad khamtam kito kiba khlem ïoh ïa ki COV, wat la ka MGSPHSVA ka la aiti ïa ki draft SOP sha ka PTVC bad sha ka Shillong Municipal Board,” ong ka kyrwoh na ka seng.
Na ka liang ka MGSPHSVA wat la ka la ong ba ka la don ka jingleit jurip lang ïa ka jaka ba shipor ha civil hospital, la donkam ruh ban long kaba shai ba ka MoU ka donkam ban shim ïa kiwei pat ki sienjam kiba shipor nalor kane ka jaka khnang ba kan pynsuk ïa kiba die madan.
