Lyngba u synñiang ki 27 ngut, leit noh synñiang sha ka longïing ha Laitlarem, Nongspung

Mawkyrwat/Nongspung, Jylliew 23: Ka kynhun ki ‘riew paidbah na kylleng sawdong ka ri Khasi ki la ïa noh synñiang para ma ki na bynta ban noh synñiang ïa ki katto katne ki longïing kiba la shah pynjulor ki ïing ki sem jong ki bad jingduh noh ïa ki mynsiem bakordor namar ka jingpynjulor u lapbah ha kine ki khyndiat sngi kiba la dep kum ka jingpyntngen bad ai mynsiem ïa ki.
Kane ka kynhun ki ‘riew paidbah ba la mait lynti da u bah Staising Kharbteng ka la shim ïa ka rai ban ïarap ïa lai tylli ki longïing kiba la shah ktah ha ki bor ka mariang ha kine ki sngi ba lah dep da kaba sdang ha ka 22 tarik u Jylliew ban leit sngewlem bad noh synñiang ïa ka longïing i kong Kesphulda Kharmyndai bad bah Nikston Jyrwa ha Laitlarem, Nongspung kaba saw ngut ki khun jong ki, ki la duh noh ïa ki mynsiem ba kordor bad uwei u khun u dang don ha ka jingshah sumar kaba la jia ha ka 16 tarik u Jylliew, 2022.
Haba kren ha ka jingïalang u bah Staising Kharbteng u la ong ba ha ryngkat ki samla, ki longkmie bad ki ‘riew rangbah kiba don ka mynsiem sngewlem kiba la noh synñiang kiba don baroh 27 ngut ki la pynmih ïa u synñiang ban ïarap ïa lai tylli ki longïing kum ka dak ban don ryngkat bad ki paradoh parasnam kiba mad ïa kum kitei ki jingjia ba sngewsih, da kaba kyntu ïa baroh ki para nongshong shnong na kylleng sawdong ka ri Khasi ba kin mih shakhmat khlem da ap ïa kiwei ba kin leh ei ei.
Shuh shuh u la pynpaw ba lada ka jingnoh synñiang na ki paradoh parasnam ka ïai bteng kin pyrshang ban ïarap ïa kiwei ruh ki longïing kiba la mad ïa kum kitei ki jingjia ha kylleng sawdong ka ri Khasi.
Ha kane ka sngi la ïa don ryngkat ruh ha katei ka sngi ki ‘riew rangbah bad nongïalam shnong.