Shillong, Nailar 28 : Ka Ryntih SC ka la jop da kaba pynliem da 2-0 pyrshah ïa ka Nangkiew Irat ha ka jingïalehkai jong ka lympung OC Blue Shillong Premier League (SPL) 2021-22 ha ka sngi Saitjaiñ ha madan Third Ground, Polo, Shillong. Katei ka nam jop ka la wan lyngba u Sheen Sohktung uba la thep marwei ïa kitei ki ar kol.
Haba mih madan ha katei ka sngi, ka Ryntih ka tam da 1 point ïa ka Nangkiew Irat kata 14 bad 13 point ha ka miej kheiñ point, ka Ryntih ha ka kyrdan kaba saw katba ka Nangkiew Irat ha ka kyrdan kaba san. Ha ka kylla kaba nyngkong (first leg) ba ki la ïakhun ha ka 26 tarik Naitung, ka Nangkiew Irat ka la lah ban pynïakhaid da 2-2 kol.
Lyngba katei ka jingjop ha ka sngi Saitjaiñ ka Ryntih ka kamai 17 point hynrei ka dang neh ha ka kyrdan ba saw bad duna da shi point ïa ka Langsning FC bad Rangdajied United FC.
Haba phai sha ka jingïakhun hapdeng kitei ki ar tylli ki team ha ka sngi Saitjaiñ, ka jingïalehkai ha ka kaba sdang ka long kaba mar ïakhaid. Ka Ryntih ha ka minit ba 21 jong ka jingïalehkai ka la ïoh nyngkong ïa ka kabu lyngba u Bickyson Kharkongor hynrei ka bol ba u la khyrwit ka la lait salit ban rung shapoh kol.
Hynrei dei ha ka minit ba 25 u Sheen Sohktung u la ïoh ban thep beit jlang ïa ka bol shapoh kol kaba la wan lyngba ka jingshut free-kick bad haduh kaba kut jong ka kylla step watla ka Nangkiew Irat ka la pyrshang ban pynphai hynrei ka khlem lah ban thep kol ha kaba ka Ryntih ka lamkhmat da 1-0.
Haba wanphai sha ka jingïalehkai jong ka kylla miet, baroh arliang ki rangïalehkai ki la ïakhun tyngeh ban thep kol. Ki rangïalehkai ka Nangkiew Irat ki la ñion sha ka kut jong ka Ryntih da ka thong ban thep ïa ka kol pynïakhaid hynrei ki khlem lah ban pyndep ha ka liang ka thep kol.
Ha ki minit ba dang sah ka jingïalehkai ka la nang ïathnem ha baroh arliang, hynrei baroh arliang ki khlem lah ban thep kol. Hapdeng ka jingïakhun kaba la ïakhaid bha, u Sheen Sohktung ha ka minit ba 81 u la thep sa ïa ka kol kaba ar kaba la pynskhem shuh shuh ïa ka kynhun kaba la lah ban teh lakam haduh kaba kut jong ka jingïalehkai ha kaba ka la pynliem syndon da 2-0.
Ka Ryntih SC ka la wanphai da ka jingjop hadien ba ka la mad nam rem da 5-0 ha ka Shillong Lajong FC bad 4-2 ha ka Malki SC. Ka jingïalehkai kaban long ha ka sngi Balang kan long hapdeng ka Langsning FC pyrshah ïa ka Shillong Lajong FC ha ka por 3:45 janmiet. Ka Langsning ha ka jingïalehkai kaba la long ha ka 16 tarik Jylliew ka la pynliem da 1-0 ïa ka Shillong Lajong FC. Kat haduh mynta ka Mawlai ka don ha ka kyrdan kaba nyngkong (26 point) bad ka don ruh ka jingkyrmen ban ïoh rah ïa ka nam lahduh kaba tam haduh 8 point ïa ka Langsning bad Rangdajied.
