Shillong, Kyllalyngkot 29: Ka Langsning FC ka la kiew sha ka kyrdan ba hynriew hadien ba jop da 2-0 kol ïa ka Nongthymmai SC ha ka OC Blue Shillong Premier League 2024 ba la long ha madan First Ground-SSA Stadium, Polo, hynne ka sngi Balang.
U Rhitso Mero u la pynkhih ïa kitei ki ar tylli ki kol ha ka 25 bad 71 minit ban kyntiew ïa ka Langsning sha ka 14 poiñ ha ka miej. Lah ban kdew ba ka Langsning ka la sdang ïa ka jingïalehkai 2nd leg ha ka rukom ba paka, da kaba khur 7 poiñ naki lai tylli ki jingïalehkai. Katba ka Nongthymmai, kaba don ha ka kyrdan ba khyndai, ka la mad mynta hynriew sien lynter ka namrem bad ka dang sahkut da tang 7 poiñ ha ka thup kyrdan ban shah sloit (relegation zone).
Haba phaidien, ka Nongthymmai ka la shah rem ha ka Langsning ha ka jingïakhun 1st leg da 3-2 kol ba la long ha ka 23 tarik Risaw bad ka donkam shisha ïa ka jingjop ban ïarap ïalade ban lait na ka jingshah pynhiar kyrdan.
Katba na ka liang jong ka Langsning pat ka la mad ïa ka jingkylla ha ka rukom ïalehkai jong ka bad lah ban ong ba kane ka kynhun ka la lah ban tehlakam ïa ka jingïalehkai la jan naduh kaba sdang. Ka jingpyrshang na u Dauruhipaia Pale ha ka minit ba 15 ka la lait salit ban rung sha kol bad ka kol kaba nyngkong la ïoh ban thep pat hadien 10 minit.
U Chusrang Sangma, u rangïalehkai ba kham khlaiñbor ha ka throw-in, u la lah ban kawang pynpoi ïa ka bol hapoh phyllaw kol kaba la donkam ïa u Rhitso tang ban pyndei tiak da ka khlieh ban thep ïa ka. Kane ka dei ruh ka kol kaba ar na bynta u Rhitso. Katto katne minit hadien, une u rangïalehkai na Nagaland u la shah kyntait ban pynkhihjar sa kawei hadien ba u Mowell Chyne ka Nongthymmai u la aiti ïala ka jong ka met ban khanglad ïa ka bol ban tam ïa u laiñ kol.
U Rhitso u la ïoh ban thep ïa ka kol kaba ar jong u ha ka minit ba 71 hadien ka jingpyrshang na u Manbhalang Nongmin kam shym la long kam, hynrei la pynurlong pat da une u rangïalehkai Number 10.
Ka Langsning ka la dei ban ïoh thep kham bun kol hynrei u Mecheal Roy Kurbah u khlem shym la lah ban thep ïa ka bol ha ka por ba u ïakynduh para marwei bad u rangapkol ka Nongthymmai – u Akash Thapa, uba hadien kane u la lah ban khanglad sa ïa u Daohipaia Rymbai ha ka khyllipmat jong ki minit pynjlan.
Ka jingïalehkai ha kane ka sngi Palei (30 tarik Kyllalyngkot, 2025) kan long hapdeng ka Rangdajied United FC pyrshah ïa ka Ryntih FC ha ka por 2 shiteng mynsngi. Haba phaidien, ka Rangdajied ka la jop da 3-0 kol ha ka jingïakhun 1st Leg ba la long ha ka 30 tarik Risaw.
