Shillong, Naiwieng 22: Ka kynhun ïalehkai jong ka Shillong Lajong FC sa shi sien pat ka la khur ïa ka namjop kaba ar pyrshah ïa ka Delhi FC hynne ka Sngi ha madan 1st Ground SSA Stadium ban bteng ïa ka lynti ïaid khlem ka nam rem mynta ka samoi ha ka lympung I-League.
Lah ban kdew ruh ba ka jingwan kyrshan u paidbah ka jylla ka la nangpynshongshit ïa ka jingïakhun bad ai mynsiem ruh ïa ki rangïalehkai ka Lajong ban ïalehkai khambha tad haduh ba ka kynhun kan ïoh mad ïa ka namjop da 2-1 kol bad knieh ruh ïa ka kyrdan ba saw na ka Delhi FC.
Haba phai sha ka jingïakhun, lah ban ong ba baroh ar kynhun ki la ïoh markylliang ki kabu ban pynkhihjar hynrei dei ka Shillong Lajong kaba la ïoh lamkhmat ïa ka jingïalehkai lyngba ka kol na u Karim Samb (Senegal) kaba la ïarap pashat bol da u Kynsaibor Lhuid ha ka 24 minit.
Wat hadien ba ka la ïoh ban lamkhmat ka kynhun ka la ïai bteng ban tehlakam ïa ka jingïakhun hynrei kam shym la ïoh shuh ban thep bad lamkhmat da tang katei ka shi kol.
Haba phai pat sha ka kylla kaba ar, ka Lajong ka la ïai pyrshang ban ñion shakhmat hynrei phewse ka Delhi FC ka la ïohlad ban pynphai ha ka minit kaba 60 na u Gaurav Rawat.
Lah ban kdew ba ka jingïakhun ka la nangshongshit hadien ba ïakhaid mar 1-1 kol bad na ka liang jong ka Lajong (kynhun ba ïalehkai hala ïing) kam shym la hun ban ïoh tang ïa ka shi point bad ka la ïai bteng ban tehlakam bad pashat bol shakhmat ka phyllaw kol jong ka Delhi FC khlem jingsangeh.
Dei ha ka 82 minit ba ka Lajong lyngba u Phrangki Buam ka la ïoh ban thep ïa ka kol kaba ar kaba la ïarap ïa ka kynhun ban khur ïa ka namjop.
Lyngba kane ka namjop ïa ka Delhi FC ka Lajong ka la kyntiew ïalade sha ka kyrdan ba saw da 9 poiñ na ar sien ki namjop bad lai sien ïakhaid. Katba ka Delhi FC, ka la hiar sha ka kyrdan ba hynriew ha ka miej, da hynñiew point na ki san sien ïakhun.
Ka Shillong Lajong FC kan pynkhreh biang ïa ka jingïalehkai hala ïing pyrshah ïa ka TRAU FC ka ban long ha ka 25 tarik Naiwieng, ha ka por 2 baje nohphaisngi ha SSA Stadium, Shillong.
