Lyngba ki QR Code phi lah ban tip ïa ki jaka ba sumar ïa kiba kyrni ka jingdih drok: Francis Kharshiïng

Shillong, Naitung 15: Ka Lympung ki Seng Kynthei ha ka jingïatreilang bad ka DREAM Mission ka tnat Social Welfare bad ka U Matter Multi Purpose Co Operative Society, nangta ka Dorbar Shnong Mawkhar ba la wanmih da u Acting Rangbah Shnong u Bah Ransom Sutnga, ki la pynlong ïa ka jingpynsngewthuh paidbah pyrshah ïa ka jingma kaba mih na ka jingdih ïa u drok ha Motphran.
Haba kren lamphang halor kane ka prokram ka President ka Kong Theilin Phanbuh ka la ong ba ka jingpynlong ïa kane ka prokram ka long halor ki jingma jingmynsaw kiba ktah na ka jingdih ïa u Drok ba la ngat da ki khun samla ka jylla.
Ka long ong ruh ba kane ka jingkyrni ha ka kam dih drok ka la long kum ka jingpang ym tang ïa kiba la ngop hynrei wat ïa ki kmie ki kpa ruh kiba mad lang ïa kane ka jingeh.
Katba u Mission Director ka DREAM Mission u Bah Francis Kharshiing haba ai ka jingïaroh ïa ka seng ki longkmie ba ki la pynlong ïa kane ka prokram u la ong, “Ngi ai khublei ïa ka Lympung ka Seng Kynthei kaba la pynpaw ka jingkloi ban ïatreilang bad ka tnat na ka bynta ka jingbha jong ka ri bad ka lawei khamtam ki samla jong ngi. Ngi na ka liang ka sorkar ngi khot ïa baroh kiba kwah ban pynlong ïa kum kine ki prokram na ka bynta ka jingbha jong kito kiba la ngop ha ki jingdih pynbuaid bad kaei kaba donkam mynta ka long ban pynshlur ïa ki samla ban shim bynta ha ki kam bapher bapher khnang ba kin lait na kine ki kam kiba ktah ïa la imlang sahlang,” bynrap u Bah Kharshiïng.
Haba kren shaphang ka jingdonkam ban pynphriang ïa ka jingïalap pyrshah drok, u Mission Director u la kyntu ruh ïa ki kali kamai bad ki ba ñiah Rapido ba kin tah ïa ki sticker QR Code kiba don ki kyrteng bapher bapher jong ki jaka sumar ne Rehabilitation Centre khnang ba kito kiba kwah ban lait noh na kane ka jingkyrni ha ka kam dih drok kin ïoh ki jingshah sumar ba biang.
Katba ka samla Affilia Nongrum ka dkhot jong ka U Matter Multi Purpose Co Operative Society ka la kren halor ka jingkoit jingkhia ka bor pyrkhat. “Dei na ka bor pyrkhat ba mih ki jingkwah ba bun rukom kaba la pynlong ruh ïa ki samla, haba ki mad ïa ki jingeh ki mad noh ïa u drok. Ka jingkyrni ka dei ka jingpang bad kum ki nongshong shnong ym dei ban banbeiñ ne ñiew beiñ ïa kiba la kyrni ha ka jingdih ïa u drok,” kyntu ka samla Nongrum.
Ha kane ka sngi la ïoh ka jingïalehkai skit na ki samla kiba leit internship hapoh ka U Matter Multi Purpose Co Operative Society haba ïadei ban tip shaphang ka jingim kiba dih drok bad kumjuh ruh ban ai ki jinghikai lyngba ki jingïalehkai jong ki ban pynphriang ïa ka jingdonkam ban pynduhjait ïa u drok na ka jylla.