Lyngba ki jingshad bad ki riam tynrai la pynkut noh ïa ka Shad Nongkrem da kaba phuh baphieng

Shillong, Naiwieng 07: Kumba ju long manla u snem ka Hima Khyrim ka la pynkutnoh ïa ka lehniam shad Nongkrem da ki jingduwai phirat bad kumjuh ruh da ki jingshad na la tynrai ha ka riam ka beit kaba shongkun.
Ha kane ka sngi la ïohi ïa ka jingwan ban ïa shim bynta da kiba bun byllien ki paidbah na ki jaka bapher bapher.
Lah ban ong ba ïa kane ka Shad Nongkrem la sdang ha ka sngi Palei da kaba pom ïa u Blang kaba long ruh katkum ka kheiñ tynrai u Khasi.
Ïa kane ka Shad Nongkrem kaba la tip ruh kum ka Pomblang Syiem la sdang da ka jingpom Blang na Ïewduh bad la synran da ki lyngdoh bad kiwei kiwei.
Ha kane ka sngi ba pynkut artat ïa kane ka Shad Nongkrem la wan ban sakhilang da kiba bun ki kynrem ki lyndan kiba la shah khot sngewbha naduh ka sngi kaba sdang bad haduh ka sngi ba pynkut jong kane ka Shad Nongkrem.
Ïa kane ka Shad Nongkrem kaba ju long manla u snem la wan ban sakhi da u Symbud Myntri Rangbah ka jylla u Bah Prestone Tynsong, nalor u MLA ka Nongkrem u Bah Ardent M Basaiawmoit, ka Kong Ampareen Lyngdoh nalor ki MDC bad kiwei kiwei kiba la shah khot sngewbha.
Ha kane ka sngi la ïohi ruh ïa ka jingwan ïa shimbynta kiba nabar jylla bad kiwei kiwei.