Lyngba ki jingpynkup burom bapher bapher, rakhe ka BJP ïa ka sngi seng ba 47 ha nongbah Shillong

Shillong, Ïaïong 11: Ka BJP Meghalaya Pradesh ka la rakhe ïa ka sngi kha kaba 47 snem jong ka da ka mynsiem kaba shitrhem bad ka mynsiem jong ka jingïatylli, ha kaba ki la don ruh ki prokram jingpynkup burom bad ki jingai jingithuh ïa ki khynnah kiba la pass bha.
Kum shi bynta jong ka jingithuh ïa ki jingnoh synniang bad ki jingkynjoh sha ki thong ha kiba bun ki jingpule, ka BJP Meghalaya Pradesh ka la pynkup burom ruh ïa ki nongshong shnong kiba la pawkhmat jong ka jylla.
Kiba la shah pynkupburom ki long u Late Martin N. Majaw – uba la ïoh burom halor ka jingpynwandur bad ohshrong ïa ka Land Transfer Act, 1971. U Bah Imei Khonstid – Sordar ka Raid Lyting (Phra Blang Khyriem Syiemship) bad Rangbah Shnong jong ka Lyting Lyngdoh ba la shakri la 41 tylli ki snem, bad la ai jingithuh ïa u halor ki kam shakri ba la aiti na ka bynta ka shnong ka thaw bad ka jinglong nongïalam.
Nangta ïa ka Kong Trinity Saioo – Padma Shri awardee, halor ki jingithuh ïa ki kam ba ratbah bad ki jingnoh synniang jong ka. U Salil Gewali – u Nongthoh ba la shemphang, bad la pynkup burom ïa u halor ki kam kiba la paw ha ka pyrthei kata ka “Great Minds of India.”
Ha ka prokram la pynkup burom ruh ïa kiba la paw bha ha ki kam ïalehkai kiba kynthup ïa ki 6 ngut kiba la ïoh takma ksiar ha ka archery na ka 1st Tribal Games kaba la long ha Raipur, Chhattisgarh.
Ki nongïalehkai kiba kynthup ruh ha ka kickboxing kiba la ïoh 2 tylli ki takma ksiar, artylli ki takma rupa bad artylli ki takma rnong ha ka Asia Pacific Open Championship kaba la long ha Bali, Indonesia.
Hadien la pynbud pat sa ka jingpynkup burom ïa ki dkhot jong ka seng kiba la aiti ïa ki kam shakri jong ki bad ki jingnoh synniang ban kyntiew ïa ka party.
Ha kane ka jingrakhe la don ruh ka jingsam khusnam na ka bynta ki nongjop ha ka Inter-College Speech Competition & Seminar, ha kaba ka Shillong Law College ka la poi ha ka kyrdan kaba nyngkong, pynbud sa ka Shillong College ha ka kyrdan baar, bad ka K.L. Bajoria College ha ka kyrdan kaba lai.
Ha kane ka jingrakhe la wan ban long kongsan da u Myntri ka sorkar jylla u Bah Sanbor Shullai bad u MLA ka BJP u Bah A.L. Hek, ha ryngkatlang bad ki heh nongïalam ka party bad ki karyakartas.
Kane ka jingrakhe ka pynpaw ruh ïa ka jingangnud jong ka party ban ai ki jingithuh ïa ki jinglong janai, ban pynshlur ïa ki jingïashim bynta jong ki samla, bad kumjuh ruh ka jingpynkhlaiñ ïa ki shnong ki thaw naduh ki tynrai jong ki.