Shillong, Nailar 23: Ka Martin Luther Christian University Press (MLCU Press), da ka jingïatreilang bad ka Academic Office, ka la pynlong ïa ka Book Levelling Workshop ha MLCU campus ha ka 22 tarik mynta u bnai ba la lamkhmat da ka Dr Sonali Nag, Professor ha University of Oxford and Education Fellow ha Brasenose College.
Kane ka workshop ka la ailad ïa ki nongïashim bynta ba kin pyrshang ban pule ïa ki kot, ban lum jingkheiñ ïa ki kot jong ki khynnah kiba pynshong nongrim halor ki sap kiba kongsan kiba long katkum ki jingdawa, kum ka jinglah ban pule lyndet, ki jingsngewthuh, ki jingpynleit jingmut bad ki jinglah ban pynïasoh ïa ki kyntien lyngba ki dur ki dar.
Na ka liang ka Dr Nag ka la batai ba ki jingpynïaryngkat ïa ki kot ki jam shalyndet ki jingsngew, kiba thmu ruh ïa kaei kaba ki nongpule ki donkam.
Lyngba ki jingïasyllok, ki nongïashim bynta ki pynleit jingmut halor ki jingïaid lynti jong ki ha ka kam pule bad ban bishar kumno ki kot ïathuh khana ki ïapher katkum ki rta jong ki kynhun.
Ka Dr Nag ka la pynshisha ba kumno ki dur ki ïalam ïa ki khynnah ban pynleit jingmut ïa kiei kiba jia shabar ne ki jingsngew kiba hapoh bad kumno kine ki pynwandur ïa ki khynnah ba kin ïathuh ïa ki khana. Ka la sam ruh ïa ki jingwad bniah jong ka da kaba pyni ba wat ki khynnah ki jubab ïa ki dur jong ki jingsngew bad ki jingpyrkhat hynrei kiba la heh la san pat ki kheiñ poh ïa ki jinglah jong ki.
Kine ki jingïasyllok ki la pynpaw ruh ïa ki bynta jong ki kyntien ha ki rukom pynïaryngkat kyrdan bapher bapher. Ka Dr Nag ka la kdew ba don ki kyntien kiba paw ba ki long kiba eh, hynrei ki khynnah barabor ki donkam ïa ki jingmut lyngba ki jingïai pule, ki nongrim bad ki jingkren kiba ai jingkyrshan hapdeng kiba la heh la san bad ki khynnah kaba ki nongwad bniah ki khot ka “extra-textual talk.”
Kane ka prokram ka la sdang da ka jingpdiang sngewbha ka Dr Minorita Lyngdoh bad ba la pynkut da ki kyntien ai khublei na ka Dr Ibasaralyne Synthiang. Kiba ïashim bynta ki kynthup ïa ki nongdro dur ba ïadei bad ki khynnah, ki nongthoh kot, ki samla pule na North-Eastern Hill University (NEHU), ki nongtrei ka MLCU, ki nongmihkhmat na ka Sauramandala Foundation, bad kiwei, ha kaba kane ka la pynskhem ïa ka jingangnud ka MLCU ban kyntiew ïa ka thoh ka tar bad ki kam shon ïa ki kot bapher bapher.
