Lyngba ki drone, hadien 8 sngi lap ïa ka met u Raja, pat lap dien ïa ka kurim

Shillong, Jylliew 02 : Ki pulit ka East Khasi Hills District ha ka sngi Nyngkong ki la pyntikna ba ka metïap kaba la sdang pyut kaba lap na ka riat ba jylliew bha ha Weisawdong ka dei ka met jong u Raja Raghuvanshi uba la jah mynta la phra sngi.
Katkum ka kyrwoh na u Superintendent of Police ka East Khasi Hills, Bah Vivek Syiem, la ïathuh ruh ba ïa ka met jong utei u nongwan jngohkai pyrthei la lap da ka jingïoh ring dur jong ka drone ba pyndonkam da ki pulit. Tad haduh mynta, ïa ka met jong ka kurim jong u Raja, ka Sonam ym pat lap dien satia.
Kine ki shi kurim na Indore ki la jah naduh ka 23tarik u Jymmang, 2025.
Ha kajuh ka por, u SP u la ïathuh ruh ba la thung ruh da ka jingtohkit kaba kyrpang ne ka special investigation team (SIT) halor katei ka jingïap jong utei u nongjngohkai pyrthei na Indore, Madhya Pradesh.
“Ïa ki jingtip kiba kham bniah yn sa lah ban pyntip shuh shuh katba ka jingtohkit ka dang ïaid,” bynrap biang u SP.
Na ka liang u SP u la ïathuh ba ka jingwad ïa kine ki shijur ka kynthup naduh ki pulit, ki SDRF, ki SOT bad ruh na ka liang ka West Jaintia Hills District Adventure Mountaineering Club. U ong ruh ba hapdeng ka jingwad, ka drone jong ki pulit ka la lap ïa ka met ïap kaba don ha riat kaba jylliew bha shapoh ki bynta jong ka Parking Lot Weisawdong kaba don ha Riat Arliang ha ka por 11:48 baje mynstep.
“Na ka daw ka jinglong riat bad ka jingjynjar ban ïaid, ïa ka metïap la rah noh sha jrong jong ka parking lot ban leh ïa ka Magisterial Inquest ïa kaba la pyndep da ka Kong Adiel R. Kyntan, MCS, Executive Magistrate, Sohra hapdeng ka por 3:30 baje janmiet haduh 4:00 baje janmiet. Ïa kane ka Inquest la pyndep da ka jingdonlang ki nongsakhi shimet na ka thaiñ,” u la ïathuh.
Shuh shuh u la pyntip ruh ba dei ki bahaiing jong u Raja Raghuvanshi kiba la ithuh ba katei kadei ka met jong u Raja lyngba ka tattoo ha ka kti kamon jong u kaba thoh Raja.
U SP u la pyntip ruh ba la lap ruh ïa ka sopti kynthei kaba lieh, u Pentra 40, bad ka LCD screen jong ka vivo mobile nalor ka smart watch na kti jong uba ïap.
Ïa ka met jong une uba ïap la pynkit noh sha NEIGRIHMS, Shillong ban leh ïa ka Post Mortem ban lap ïa ka daw jong ka jingïap.
“Ki pulit ki dang tohkit bniah halor kane ka jingjia bad ym shym la kyntait ïoh don kano kano jingleh sniew ïa mynta hi,” u la ong.
Tangba u ong pat ba ïa ka jingtip shaphang ka kurim jong utei uba ïap, ka Sonam Raghuvanshi ym pat tip satia.
U SP u ong ruh ba ka jinglap ïa ka met jong u Raja kadei da ka jingtrei borbah jong ki pulit kiba la pynlong ka jingwad da kaba rung bad tur lut ïa ki jaka bad ki riat kata ruh hapdeng ka jingther jong u lapbah ba jur ha kine ki khyndiat sngi.