Ka prokam ïalehkai ha kane ka sngi Thohdieng:
kan dei jong ka Group B
Ha ka por 1 baje nohphai sngi
Ka Mawlynrei pyrshah ïa ka Shillong Lajong
Ha ka por 4:30 baje janmiet:
Ka Mawkriah West pyrshah ïa ka Laitkyrhong
Shillong, Naiwieng 27: U Pynshailang Lyngdkhoi (53’, 55’ & 57’ & 70’) u la pynkhihjar saw sien ha kaba ka Meghalaya Police ka la wanphai nadien na ka shi kol ban pynliem ïa ka Umlyngka ha ka jingïalehkai jong ka Group A ha ka SSA Champions Cup 2025 kaba la long hynne ka sngi Palei, 27 tarik Naiwieng, ha madan First Ground-SSA Stadium, Polo.
Hadien kane, ka Langsning ka la pynliem noh ïa ka Mylliem Lum da 2-0 kol ban khur ïa ka jingjop kaba ar sien lynter ha kane ka lympung, kaba dei ruh ka jingïalehkai jong ka Group A.
Haba phai sha ka jingïakhun ba nyngkong, dei ka Umlyngka kaba la ïoh lamkhmat ïa ka kylla step lyngba u Anthony Kharkongor (45’+2), da kaba thep ïa ka penalty ha ki minit pynjlan shuwa ban jam sha ka por shongthait.
Ka Umlyngka ka la ïalehkai da kaba kham pynkhlaiñ shadien bad ap thap ïa ki kabu ban rah syndet syndet ïa ka bol shakhmat. Kane ka buit ka la treikam bha tad haduh ba la jam sha ka kylla miet ha kaba ka MLP ka la ïoh ban synshar ïa baroh kawei ka jingïalehkai da kaba thep saw tylli ki kol lyngba u Pynshailang, kynthup ïa ka hat trick hapoh ka por kaba tang 5 minit (53’, 55’ & 57’).
Ka kol kaba nyngkong ka la jia hadien ba u rangapkol ka Umlyngka, Babitlang Wahlang, u khlem shym la lah ban tehlakam ïa ka bol pashat ba la pynrung hapoh phyllaw kol kaba la ailad ïa u Pynshailang ban shim ïa ka kabu bad pynïakhaid ïa ka jingïalehkai.
Ka kol kaba ar ka la jia namar ka jingbym ïasngewthuh jingmut hapdeng u rangïalehkai dien jong ka Umlyngka uba la iehnoh ïa ka bol na ka bynta u Babitlang ban pynkiar na ka jingma. Ka jingbym poi pyrkhat u rangap kol ka la plielad ïa u Pynshai ban mareh pynstet bad pyndei tang tiak ïa ka bol shapoh kol. Ka hat-trick jong u ka la wan na ka jingshut korner; hadien ba ka bol ka la hap ha ki kjat jong u, bad u la ïohlad ban shut jlang ïa ka bol sha kol.
Ka kol kaba saw ruh ka dei kaba la thaw donbok, ha kaba uwei u nongïalehkai ba shadien u la syntuid hadien ba ïohpdiang ïa ka bol bad u Pynshai u la don hajan ban leit shimti ïa ka bol bad mareh shakhmat shuwa ban thep jlang ïa ka sha kol.
Lah ban ong ba sa shi sien pat, ki liang pyrshah kim shym la lah ban khanglad ïa u Pynshailang, uba dei u nongthep kol ba bun tam jong ka First Division, ha kaba u la jam ha khlieh duh ha ka thup ki nongthep kol ba bun tam ha kane ka Champions Cup kaba nyngkong.
Ka jingïakhun ha ka por janmiet, u Richie Kharbani (36′) u la pynkhih ïa ka kol kaba nyngkong ha ka kylla step shuwa ba u Donlad Diengdoh (67′) un pynbud ïa kaba ar na ka bynta ka Langsning ha ka jingïakhun pyrshah ïa ka Mylliem Lum.
Ka Mylliem Lum kaba la ïakhaid ha ka jingïakhun kaba nyngkong pyrshah ïa ka Mawkasiang, ka la ïalehkai kham phikir bha pyrshah ïa ka lahduh jong ka Shillong Premier League ka Langsning, kaba la pynliem ïa ka Umlyngka da 2-0 kol ha ka sngi Nyngkong. Hynrei u Richie u la ïohlad ban thep ïa ka kol kaba nyngkong na ka bynta ka Langsning hadien palat shiteng kynta ba la ïaid ka kylla step shuwa ba u Donlad un pynthikna ïa ki lai poiñ da kaba pynbud ïa ka kol kaba ar ha ka 67 minit.
Da kaba jop ar sien na ki ar tylli ki jingïalehkai, ka Langsning ka la kamai mynta 6 poiñ, katba ka Meghalaya Police ka la khur 3 poiñ na kawei ka jingïalehkai. Ka Mawkasiang bad ka Mylliem Lum ki dang sahkut mar 1 poiñ, katba ka Umlyngka kam pat shym la ïoh ban kyntiew jingkheiñ eiei.
Ka jingïalehkai ha kane ka sngi Thohdieng, ha ka Group B, ka Mawlynrei kan ïalehkai ïa ka jingïakhun kaba nyngkong jong ki ha ka por 1 baje nohphai sngi pyrshah ïa ka Shillong Lajong (kaba la jop ïa ka jingïalehkai ba nyngkong pyrshah ïa ka Mawkriah West ha ka sngi Ba-ar). Hadien kane yn bud sa ka jingïalehkai jong ka Mawkriah West kaba dang ïakhun ban wanphai biang haba ki ïakynduh pyrshah ïa ka Laitkyrhong (kaba mad ïa ka namrem ha ka jingïalehkai ba nyngkong ha ka Nongkseh) ha ka por 4:30 baje janmiet.