Mawkyrwat, Jylliew, 22: Ka lympung ïalehkai kynjatbol kaba la tip kum ka “Inter-Dong Football Tournament 2023” ba la pynïaid da ka Marshilong Sports & Cultural Club ka la poi noh sha kaba kut ha kaba ka Mawhiang B ka la long ka lahduh bad jop pyrshah ïa ka Mawhiang A da 7 – 6 kol ha madan Mawhiang, Marshilong, South West Khasi Hills District.
Haba phai ha ka jingïalehkai, ka la long ka jingïalehkai kaba itynnad bha watla ka la don ka jingthut ha ka madan namar ka jingdon jong u slap. Kumta katba ki minit ki la nang ïaid shakhmat na ka liang ka Mawhiang A ka la ïoh ban pynkhih ïa ka jar kaba nyngkong eh ha ka minit kaba 27 lyngba u Builderson Lyngkhoi bad ïa kane ka kol u la ïoh thep ha ka jingïalehkai jong ka kyllastep.
Haba wan biang ha ka jingïalehkai jong ka kyllamiet pat, ka jingïakhun ka la nangkham pyni-tynnad shuh shuh namar ki ‘rangïalehkai jong ka Mawhiang B ruh ki la sdang ban ïa khun tyngeh khnang ban ïoh ban pynphai ïa ka shi kol hynrei bun ki jingpyrshang jong ka ki la long leh noh ei, hynrei da ka jingïakhun kaba tyngeh ka Mawhiang B ka la ïoh ïa ka kabu ksiar ban pynrung ïa ka bol hapoh ka kol ha ka minit kaba 68 lyngba u Rockfulstar Lyngdoh.
Hadien ba ki la ïa khaid mar shikol, ki ‘rangïalehkai jong baroh ar kynhun, ka Mawhiang A bad Mawhiang B ki la sdang ban don ka mynsiem jong ka jingïakhun kaba tyngeh shuh shuh bad ban ïoh ban ïa pyntam ïa ki kol khnang ban pynpoi ïa la ka kynhun sha ka thong jong ka jingjop hynrei hapdeng kata ka por ïalehkai ka la shu kut noh ha kaba baroh ar ki la ïa khaid mar shikol. Kumta ban rai ïa ka kynhun kaba jop ne kaba rem, ki nongpynïaid ki la shu pynïaleh noh da ka Tie Breaker ha kaba ka Mawhiang B ka la tam noh da 7 – 6 kol pyrshah ïa ka Mawhiang B, bad ha kane ka kynhun jong ka Mawhiang B ka la rah ïa ka nam jingjop.
U kongsan uba la wan ban pynhap pyrda ïa kane ka “Inter-Dong Football Tournament 2023” u dei u bah J. Nongsiej na ki ‘riew rangbah jong ka dong ka thaiñ bad bynrap ïa ka jingkren kum u kongsan u la ong ba kane ka lympung ïalehkai kam dei tang ka rynsan ban pyni ïa ki sap ki phong ba ki ‘rangïalehkai ki lah ha ka ban pashad ïa ka bol hynrei ban don ruh ka jingïatreilang ryngkat ka jingïatylli hapdeng ka jingïalehkai namar lada ym don ïa kane ka bynta kumm ka kynhun kan nym lah ban poi sha ka thong jong ka jingjop.
Ha kawei ka phang, u la ong ruh ba kum ki khun samla ka dei ka jingkitkhlieh ïa ka mei mariang sawdong sawkun namar lada ki leh pathar ïa ka mei mariang ma ka ruh ka don ka la jong ka bynta bad u la ban jur ba ka kam jngohkai pyrthei ka dei kawei na ki lad ba kum ki khun samla ki dei ban phai khmat ha kum kane ka juk kaba mynta.
Haba kren ai mynsiem na ka bynta ki ‘rangïalehkai, u bah J. Nongsiej u la ong ba kum ki ‘rangïalehkai ki dei ban long kiba trei shitom ryngkat ka jingki lanmet khnang ba kin nangkiew ha kane ka kam. U la ban jur ruh ba kum ki ‘rangïalehkai lad ki kwah ban kiew ha kane ka kam ki dei ban kiar na ki kam sniew kum u drok, ka kyiad bad kiwei kiwei ki jingdih kiba pynduh bor bad pyntroiñ ïa ka met u briew.
Ha kane ka sngi ïadonlang naduh ki nongkitkam jong ka Marshilong Sports & Cultural Club, ki ‘riew rangbah, ki longkmie longkpa, ki khun samla, ki hep kiba rit.
