Lyngba ka song pisa u Myntri Rangbah, pynbha briew ka Riatsamthiah ïa ka shnong baroh kawei

Shillong, Nohprah 23: Ka Dorbar Shnong Riatsamthiah sa shi sien pat ka la kmen hadien ba ka la ïoh ïa song pisa kaba T. 87500 na u Myntri Rangbah jong ka jylla na ka bynta ban pynitynnad ïa ka shnong baroh kawei.
Lah ban ong ba na ka liang jong ka shnong ka pyndonkam hok ïa kane ka pisa ha kaba ka la lah ban pynbha briew shisha ïa ka shnong baroh kawei.
Kawei na ki jaka kiba kane ka shnong ka la lah ban pynbha briew ka dei ka lynti kaba ïaid sha Lawmali ha kaba ïa kane ka lynti ïaid la lah ban pynbha briew da ki jingai rong kiba itynnad.
Ha kaba ïadei bad kane na ka liang jong ki nongshong shnong ki la ai ka burom kaba khraw ïa ka shnong kaba la lah ban pynitynnad ïa ka shnong da ki jingpusharai bad kiwei pat ki jingai rong ai rup kiba la pynitynnad ïa ka shnong hi baroh kawei.
Ïa kane ka song pisa la leit ban shimti hi da u rangbah Shnong u Bah M Kharkrang ha ka jingïadonlang kiwei kiwei pat ki nongkitkam shnong bad ïa kane ka song pisa la aiti na ka bynta ban pynbha briew ha shwa ka Khrismas.
Na ka liang jong u Rangbah Shnong u la ai khublei ïa u Myntri Rangbah bad kumjuh ruh ïa ka kynhun Myntri baroh kawei kiba la shim ïa kane ka kam na ka bynta ban pynitynnad ïa ki shnong baroh kiba don ha ka sor Shillong.